Microsoft компанияси ўзининг янги Windows 10 операцион тизимини USB-флешкаларда сотишни бошлаши мумкин. Бу ҳақда WinFuture.de портали хабар бермоқда.
Бу қарор янги операцион тизимни дисководга эга бўлмаган ноутбуклар, ультрабукларга ўрнатиш имконини беради. Кўпинча бундай қурилмаларда вазнни ва корпус ичидаги жойни тежаш мақсадида DVD-дисководлар ўрнатилмайди.
Айни пайтда Microsoft операцион тизимлари DVD-дискларда сотилади. Бу операцион тизимларни USB-флешкадан ўрнатиш учун компания флешкага операцион тизим образини автоматик равишда юклаб, Windows`ни флешкадан ўрнатиш имконини берадиган махсус дастур ишлаб чиқди.
Windows 10 операцион тизими 29 июлдан бошлаб сотувга чиқарилиши режалаштирилган. Windows 7 ва Windows 8/8.1 фойдаланувчилари янги операцион тизимни интернет орқали бепул янгилаб олишлари мумкин.