АҚШлик эр-хотин Жаннетт ва Александр Точко 75 йил бирга яшаб, бир кун фарқ билан ҳаётдан кўз юмишди, деб хабар бермоқда ABC News телеканали.
Улар бир йилда – 1919 йилда Коннектикут штатининг Стэмфорд шаҳрида дунёга келишган. Иккиси ҳам польшалик муҳожирларнинг фарзандлари ҳисобланарди. Улар 1940 йилда турмуш қуришган.
Точколарнинг ўғли Ричард Точконинг айтишича, унинг отаси Александр Точко гольфга жуда қизиққан. У яқинда йиқилиб, сонини синдириб олмагунча деярли ҳар куни ушбу севимли машғулоти билан шуғулланиб келган. Александрнинг аҳволи тобора оғирлашиб борган ва у билан бир вақтда рафиқаси ҳам ўзини ёмон сеза бошлаган.
Александр 17 июнда биринчи бўлиб ҳаётдан кўз юмди. “Отам онамнинг қўлларида жон берди ва отам айнан шундай бўлишини хоҳлар эди”, деб айтди уларнинг қизи Эйми Точко-Кушман.
“Кўряпсанми, сен айнан шундай бўлишини истардинг. Сен менинг қўлларимда жон бердинг. Мен сени севаман, мени кут, яқин орада сен билан бирга бўламан”, деб айтган Жаннетт ўз эрининг вафотидан кейин. Эртаси куни унинг ўзи ҳам боқий дунёга йўл олди.
Аввалроқ 67 йил бирга яшаган янги зеландиялик эр-хотин бир кунда вафот этганлари маълум қилинганди.