Тошкентлик Барчин Лазизованинг икки ўғлининг тўйига атаб олиб қўйган 26 млн сўмлик кийим-кечак ва матоларини алдов йўли билан олган фирибгар қўлга олинди. Бу ҳақда “Огоҳ” нашри ёзмоқда.
1977 йили таваллуд топган Фарангиз Холиқова узоқ вақт қаллоблик билан кун кечириб юрган. Бир куни Барчин Лазизованинг онаси Роҳила ая оғир хасталикка чалингани, оилага зудлик билан жарроҳлик амалиёт учун пул кераклигини эшитган Холиқова уларнинг хонадонига бориб, барча кийимларни сотиб беришини айтди. Томонлар 26 млн сўм нархга келишишди. Холиқова 10 кун ичида пулларни етказишини маълум қилди, аммо шундан сўнг қўнғироқларга жавоб бермай қўйди.
Хавотирга тушган Лазизова уни Фарангиз билан таништирган қўшниси Насимадан унинг уйини аниқлади. Аммо бундан ҳам натижа бўлмади: Холиқова ёлғон ваъдалар бериб, пулларни тез орада етказишига Лазизовани ишонтириб қайтариб юборди.
Орадан анча вақт ўтгач, пуллар қайтмаслигини тушунган Лазизова унинг устидан милицияга арз қилди. Олиб борилган суриштирув ишлари натижасида вазият аниқлаштирилиб, жиноятчи жазога тортилди.
