25 ёшли қозоғистонлик дастурчи Асхат Мурзабоев Буюк Британиядаги Barclays банкига ишга киргач, ярим йил давомида ишлаб топган маошини саратонга қарши курашиш халқаро марказига топширди.
У ўзининг бу саховати ҳақида блогер Бўта Жумановага берган интервьюсида гапириб ўтган.
Мурзабоев ярим йилда ўзининг янги ишида олган маоши 2 млн доллардан кўпроқ бўлганини тан олган.
"Мен саратон хасталигини дунёдаги асосий муаммолардан бири сифатида биламан. Бу хасталикни даволаш бошқа хасталикларда бўлгани каби оддий эмас. Мен бу муаммо бўйича докторлик иши ёқлашни орзу қилардим. Лекин бу жуда машаққатли иш эканини биламан. Бунинг учун 6 йил давомида лабараторияда тунашга ва хасталикни ўрганишга тўғри келади. Мен бу ишни қила оладиган, шу ишга умрини бағишлайдиган одамларни жуда ҳурмат қиламан. Бундай кишилар мендан кўра кучли ва мендан кўра дадил эканини биламан, шунинг учун уларга ёрдам беришни истайман", дейди Асхат.
Муразбоевнинг таъкидлашича, дунёда илм-фан ривожи учун зарур даражада маблағлар ажратилмаяпти. Шунинг учун у инсоният муаммоларига қарши курашда ўз ҳиссасини қўшишни истаган.
"Одамлар бир миллион ишлаб олгач, иккинчи миллионни ишлашга киришади. Ахир ҳаётда яшашдан асосий мақсад пул ишлаб топиш эмаску. Олдингга пул ишлаб топишдан кўра анча юқорироқ мақсадларни қўйишинг керак. Мен янги фойдали хизматлар яратишни мақсад қилганман. Одамларга ўз лойиҳаларим билан фойдам тегишини ва бундан озгина фахрланиб яшашни истайман", дейди ёш дастурчи.
У Қозоғистонда бир катта завод раҳбари билан суҳбатдан кейин ўзида шундай фикрлар пайдо бўлганини қайд этиб ўтган.