Актриса Мила Йовович ўзининг инстаграмдаги саҳифасида “Ёвузлик маскани” (“Обитель зла”) фильми суратга олиш жараёнига тайёргарлик кўраётганини намойиш этувчи фотосуратни жойлаштирди.
“Кўпчилик кутган воқеа содир бўлди: Йовович-Андерсон клани учун зомбиларни йўқ қилиш мавсуми очилди, дея оламан. Суратда менинг юзимни “Ёвузлик маскани-6” фильмига тайёрлашаётгани акс этган. Жанубий Африкадаги суратга олиш ишларига кетяпман”, деб ёзди актриса фотосуратга берган изоҳида. Актриса бу фотосуратда баданига бинт боғланган ва тақир бош қиёфада акс этган.
Бироқ суратда актриса ҳақиқатдан ҳам сочларини олдириб ташлагани ёки бу грим эканлигини фарқлашнинг имкони йўқ.
Пол У.С.Андерсон режиссёрлиги остида суратга олинаётган “Ёвузлик маскани-6” фильми 2016 йилнинг 2 сентябридан катта экранларга чиқарилади.