АҚШда 140 мингдан кўпроқ киши Зимбабведа ов пайтида Сесил лақабли шерни отиб ўлдирган АҚШлик стоматолог Уолтер Палмернинг Зимбабвега топширилишини сўраб, мамлакат ҳукуматига йўлланган арзномани имзолашди, деб хабар бермоқда Reuters ахборот агентлиги.
АҚШ қонунларига кўра, агар арзнома бир ой ичида 100 минг имзо тўпласа, ҳукумат унга жавоб бериши керак.
АҚШлик стоматолог Уолтер Палмер Зимбабведа бўлганда ов пайтида калласи орқасидаги ёли ноодатий қора рангда бўлгани билан машҳур Сесил лақабли шерни отиб ўлдирган.
Палмернинг таъкидлашича, у ўз гидларига ишониб, унга ов қилса бўладиган ҳайвонни топиб беришади, деб ўйлаган. Баъзи маълумотларга кўра, у шерни отиб ўлдириш имконияти учун 50 минг доллардан кўпроқ пул тўлаган.
АҚШ ОАВлари берган маълумотларга кўра, Палмер 2008 йилда Висконсин штатида қора айиққа браконьерлик ови қилганликда айбдор деб топилган эди.