Бугунги кунда кўчаларда “илма-тешик” либослар кийиб юрган болаларнинг кўпайиб бориши маънавий ҳаётга салбий таъсир кўрсатиши мумкин. Бу ҳақда Республика маънавият тарғибот маркази бош мутахассиси Шерзод Шарипов айтиб ўтди.
“Ўзини ҳурмат қилувчи киши борки, бошқаларнинг ғашини келтирмайдиган, ортиқча безаклардан ҳоли бўлган содда, аммо чиройли либос кийишни маъқул кўради. Аммо бугун кўча-кўйда кўпайиб бораётган илма-тешик либос кийиб юрган ёшларнинг ички маданияти ҳақида қандай илиқ сўз айтиш мумкин?”, – унинг сўзлари келтирилади “Жамият” газетасида.
Шариповнинг фикрича, “оммавий маданиятга кўр-кўрона эргашиб, ўзлигини бой бераётган бундай кишилар” нафақат ўзининг, балки яқинларининг ва атрофдаги бошқа одамларнинг маданиятига салбий таъсир кўрсатади.
Газетанинг илгариги сонларидан бирида “Кийимингиз нега йиртиқ?” номли мақола чоп этилган эди. Ушбу мақолага муносабат билдириш баробарида бир қатор жамоатчилик вакиллари ҳамда давлат идоралари ходимлари бундай турдаги либосларни танқид остига олишди. Жумладан, фавқулодда вазиятлар вазирлиги ходими Роҳила Турдиева муаммони ҳал қилиш учун биринчи навбатда мамлакатдаги тикувчи ва дизайнер мутахассисларга миллий анъаналарга мос либослар яратиш борасида кўникмалар бериш ҳамда уларни ушбу фаолиятга рағбатлантириш зарурлигин таъкидлади.