Нью-Йорк судида иши кўриб чиқилаётган Ўзбекистон фуқароси ИШИД таркибига қўшилмоқчи бўлганини ва ушбу гуруҳга ёрдам беришга ҳаракат қилганини тан олди.
Нью-Йорк шарқий округи прокурори вазифасини бажарувчи Келли Каррининг сўзларига қараганда, 25 ёшли Абдурасул Жўрабоев Сурияга чиқиб кетиб, у ерда гуруҳ таркибига қўшилишни истаган. АҚШдан чиқиб кета олмаган тақдирда эса шу ерда уюштирилажак террорчилик актларига кўмак беришни режалаштирган.
Жўрабоевнинг Бруклинда истиқомат қилувчи 4 шериги бўлган. Уларнинг 3 нафари Ўзбекистон, 1 нафари Қозоғистон фуқароларидир. Аммо улар ҳозирча судда ўз айбини тан олмади.
Қозоғистоннинг 19 ёшли фуқароси Аҳрор Саидаҳмедов шу йилнинг февралида Нью-Йоркдаги Жон Кеннеди номли халқаро аэропортда қўлга олинган эди. У Туркияга учиб кетмоқчи бўлганида тўхтатиб қолинган эди. Бир неча кундан сўнг унга молиявий ёрдам кўрсатган Ўзбекистон фуқароси, 30 ёшли Аброр Ҳабибов қўлга олинган.
Бундан ташқари, март ойида 26 ёшли Дилҳаёт Қосимов ва июнь ойида 29 ёшли Акмал Зокировлар қўлга олинди.
