UzreportTV телеканали 2015/2016, 2016/2017, 2017/2018 мавсумларида футбол бўйича УЕФА Чемпионлар лигаси учрашувларини Ўзбекистон ҳудудида тўғридан-тўғри трансляция қилиш ҳуқуқини берувчи лицензион пакетни харид қилган. Бу ҳақда 8 сентябрь куни пойтахтимиздаги Халқаро бизнес марказида бўлиб ўтган матбуот анжуманида эълон қилинди.
Анжуманда УЕФА таркибига кирувчи футбол клубларининг эксклюзив тижорат агенти ҳисобланган “TEAM Marketing” (Швейцария) агентлиги ҳамда “SARAN MEDIA INTERNATIONAL” (Мальта) компаниялари вакиллари, шунингдек, UzreportTV телеканали масъул ходимлари журналистлар саволларига жавоб беришди.
УЕФА Чемпионлар лигаси учрашувларининг 2015/2016 йилги тақвимига мувофиқ, UzreportTV телеканали орқали тўғридан-тўғри трансляциялари 15 сентябрдан бошлаб амалга оширилади. Бунда турнинг марказий учрашуви тўғридан-тўғри эфирга узатилса, энг қизиқ баҳслар ёзиб олинган ҳолда намойиш этилади. Шунингдек, учрашувларнинг қизиқарли вазиятлари ва ўйинларга оид бошқа аҳамиятга молик маълумотлар акс этган “Highlights” ва “Magazunes” каби кўрсатувлар ҳам телевидение, Интернет тармоғи ва мобил алоқа орқали трансляция қилиш ҳуқуқи сотиб олинган.