Ислом дунёси ҳали уйғонгани йўқ. Бу юз берганда “ИШИД” террорчилик ташкилотига қийин бўлади, деб ҳисобламоқда Чеченистон раҳбари Рамзон Қодиров. Қодиров ўзининг ижтимоий тармоқдаги саҳифасида Россия президенти Владимир Путиннинг Душанбедаги КХШТ саммитида айтиб ўтган Яқин Шарқдаги вазиятни тартибга солиш бўйича фикрини қўллаб-қувватлашини ёзди.
“Владимир Владимирович вазиятдан чиқишнининг реал механизмини таклиф қилмоқда. У террорчиликка қарши кураш масаласида икки ёқлама стандартлардан, ғарбга тўғри келмайдиган ҳукуматларни террорчилик ташкилотлари ёрдамида ўзгартиришдан воз кечишга чақирмоқда”, деб ёзди Қодиров.
Унинг айтишича, “Иблис давлати”да ҳеч қандай муқаддас нарса йўқ. Улар бутун дунёга машҳур диний арбоблар ва кўп асрлик қадамжоларни йўқ қилиб исломнинг душманлари эканликларини исботладилар.
“Ироқ ва Сурияни йўқ қилиб, улар Макка, Мадина ва Қуддусдаги табаррук жойларга қўл узатиши аниқ эди. Буларнинг ҳаммаси уларнинг махсус хизматлари ёрдамида ташкил этилган террорчилик ташкилотларини қурол, ҳарбий техника ва пуллар билан таъминлаётган ғарб давлатларининг бевосита қўллаб-қувватлаши билан содир бўлмоқда”, деб айтмоқда Рамзон Қодиров.
Чеченистон раҳбари Путиннинг “ИШИД” сафларида россиялик жангариларнинг тайёрланаётгани юзасидан билдирган хавотирига қўшилишини айтди. “Биз ушбу таҳдидга қарши курашиш бўйича жиддий чоралар кўрмоқдамиз. “ИШИД”га кетганлар учун Чеченистон эшиклари энди ёпиқ. Бу террорчиларнинг паспортларини бекор қилиш бўйича қонун қабул қилиш керак. Бунинг иложи йўқ дейдиганларга эса қайтиб келган бундай кимсаларни ўз тарбиясига олишни таклиф қиламан”, деб қўшимча қилди Қодиров.
Қодиров “Макка ва Мадинага қонга ботган қўлларини чўзмоқчи бўлганларни” тўхтатиб қолишга мусулмонларнинг кучи етади, деб ишонч билан айтмоқда. “Шунинг учун “ИШИД” эгаларига эс-ҳушини йиғиштириб олиб, ислом дунёсини барбод қилиш бўйича ўйинларни бас қилишни таклиф қиламан. Ислом дунёси ҳали уйғонмади. Бу юз берганда эса “Иблис давлати” ва қандайдир “Ал-Қоида”ларнинг эгаларига қийин бўлади”, деб қўшимча қилиб ўтди Рамзон Қодиров.