АҚШнинг Forbes журнали ҳисоб-китобларига кўра, машҳур гольфчи Тайгер Вудс охирги ўн йилликнинг энг кўп фойда олган 20 спортчиси орасида энг кўп пул топган.
Вудснинг даромади 845 млн долларга баҳоланди. Гольфчи 2000-йиллар охирида йилига 100 млн доллардан ишлаб топган. Бироқ 2009 йилда спортчи рафиқасига хиёнат қилгани фош бўлгач унинг барча ҳамкорлари ундан юз ўгиришган. Охирги икки йил ичида бир вақтлар 1-рақамли гольфчи бўлган Вудс жароҳатлари туфайли кўпгина мусобақаларни ўтказиб юборди ва ҳозирда гольфчилар рейтингида 292-ўринни эгалламоқда.
Рейтингда 2-ўринни боксчи Флойд Мейвезер эгаллади. 2005-2015 йиллар давомида супербоксчи 660 млн доллар ишлаб топган. Боксчи бу сумманинг деярли ярмини Мэнни Пакьяога қарши учрашуви эвазига олган.
3-ўринни баскетболчи Коби Брайант эгалламоқда, у охирги ўн йиллик давомида 475 млн доллар ишлаб топди.
Энг кўп пул топган спортчиларнинг юқори ўнталигидан баскетболчи Леброн Жеймс (472 млн), гольфчи Фил Микельсон (468 млн), теннисчи Рожер Федерер (455 млн), футболчи Дэвид Бекхэм (441 млн), боксчи Мэнни Пакьяо (432 млн) ва дунёнинг иккита энг кучли футболчиси Криштиану Роналду (407 млн) ва Лионель Месси (350 млн) ўрин олди.
Рейтингнинг иккинчи ўнталигига “Формула-1” пойгасининг уч нафар пойгачиси –Фернандо Алонсо, Кими Райкконен ва Льюис Хэмилтон ҳамда икки теннисчи – Рафаэль Надаль ва Мария Шарапова киритилди.
Дунёнинг энг катта ҳақ олувчи спортчиларининг ўн йиллик давомида ишлаб топган пулларининг умумий миқдори 7,7 млрд долларни ташкил қилди.