Яманда озиқ-овқат маҳсулотлари учун нарх-наволар қуролли можаролар бошланганидан бери 45 фоизга қадар ўсди. Бу ҳақда БМТ бош котибининг расмий вакили Стефан Дюжаррик маълум қилди.
Унинг сўзларига кўра, фақатгина сентябрь ойида нархлар ўтган ойдагига қараганда 28 фоизга кўтарилган. “Келиб тушаётган хабарларга кўра, озиқ-овқат маҳсулотлари нархи сентябрь ойида августга нисбатан 28 фоизга ошиб, инқироз давригача бўлган пайтдагидан 45 фоизга қимматлашди”, - деди у.
Дюжаррикнинг таъкидлашича, БМТ мамлакатда ёнилғи етишмаслигини ҳам қайд этмоқда. “Гуманитар масалалар координацияси бўйича бошқарманинг хабар беришича, сентябрь ойида Яманга Қизил денгиз орқали ёнилғига бўлган эҳтиёжнинг фақатгина 1 фоизини қоплашга етарли маҳсулотлар кириб келган”, - деди у. Ўтган ойда эса бу рақам 12 фоизни ташкил этган.
БМТ маълумотларига кўра, Яманда ҳарбий ҳаракатлар бошланганидан буён 2,1 минг тинч аҳоли вакиллари ҳаётдан кўз юмди, мамлакат фуқароларининг тахминан 80 фоизини ташкил этадиган 21 млн яманлик озиз-овқат, дори-дармон ва бирламчи маҳсулотларга эҳтиёжманд. Тижорий кемалар орқали қурол-яроғ олиб кирилишидан хавфсираган Саудия Арабистони бошчилигидаги коалиция Яманни тўлиқ блокада қилгани сабабли мамлакатдаги гуманитар вазият тобора мураккаблашиб бормоқда.