“Йиғлаётган шаҳид”нинг қўпорувчиликни амалга оширишга йўл олаётгани қайд қилинган видеолавҳа бутун дунёни ларзага солди. Қирғизистоннинг кичик бир шаҳрида эса видеони кўрганлар унинг “қаҳрамон”ига қўшилиб йиғлашди – марҳум террорчи уларнинг жигари бўлиб чиқди.
Қирғизистонлик ўзбеклардан бўлган, Жалолободнинг Сўзоқ шаҳрида туғилиб ўсган Бобур Исроилов Россияга ишлагани кетиб, у ердан Туркияга йўл олди. Ушбу давлат орқали эса Сурияга йўл олди ва террорчилар сафларига қўшилди. Бундай воқеалар жуда кўп такрорланмоқда ва, таъкидланишича, террорчиларнинг қармоғига асосан ёшлар илинмоқда.
Қирғизистонлик Ҳамидулло Бакиров видеодаги террорчи унинг жияни Бобур Исроилов эканлигини тасдиқлади.
“Биз яхши болани тарбиялаётган эдик, у яхши инсон бўлиб улғаётган эди. У уйланиб, фарзандлар кўришини истаган эдик. Ишлаб, одамларга фойда келтиришини истаган эдик. Лекин уни алдашди, у Сурияга кетиб қолди”, - деди у.
Ўзига Жаъфар ал-Тайёр исмини олган Бобур Исроиловни отаси ташлаб кетган, онаси эса эрта оламдан ўтган. Уни холаси ва тоғаси тарбиялаган.
Холаси Ҳамида Бакированинг таъкидлашича, у мактабда яхши ўқиган.
“У қандай қилиб бунақа йўлга кириб қолганини тушунолмай гарангмиз”, - ишонтирди аёл, кўз ёшларини тийиб тура олмай.
Айни кунларда Сурияда жангарилар тарафида туриб ҳарбий тўқнашувларда 2 минггача Ўрта Осиё вакиллари иштирок этаётгани тахмин қилинмоқда. Улардан кўплари у ердан ўзлари қидирган нарсани топа олмаяпти, лекин аксарият қисми бошқа юртига қайта олмаяпти.