Париж терактининг энг қонли воқеалари рўй берган "Батаклан фожиаси" вақтида юз берган яна бир воқеа ҳақида сўзлаб берилди.
The Independent нашрига хабар беришларича, "Батаклан" театрига жангарилар бостириб кириб, одамларни ўққа тутишни бошлагач, театрга ўзининг 5 ёшли ўғли ва 61 ёшли онаси билан келган Эльза Дельплас қаҳрамонлик кўрсатган. У қирғин вақтида ўз ўғлини омон сақлаш учун елкаларини ўқлар ёмғирига тутиб берган.
5 ёшли Луи омон қолган, уни қутқаришга ҳаракат қилган онаси ва бувиси ҳалок бўлган.
"Эльза ва унинг онаси Патрисия "Батаклан фожиаси" вақтида ҳалок бўлишди. Луи қонга беланган онаси билан шифохонага борган", дея ҳикоя қилади Эльзанинг дугонаси Сихем Суи.
Унинг айтишича, Эльза ҳар қандай ёмон кунларда ҳам юзида табассум сақлаб қоладиган самимий ва оқкўнгил инсон эди.
Эслатиб ўтамиз, 13 ноябрь оқшомида Парижда содир этилган давомли терактлар туфайли 129 киши ҳалок бўлган, 352 киши жароҳатланган. Шифохонадагиларнинг 99 нафари оғир аҳволда қолмоқда.