Парижда бошланган Иқлимий саммитга қарши намойиш охири тартибсизлик билан якунланди ва полиция 208 кишини қўлга олди. Бу ҳақда Itele телеканал эфирида Франция ИИВ раҳбари Бернар Казнёв маълум қилган.
Унинг айтишича қўлга олинганлардан 174 нафари ҳибс қилинган.
Дастлабки хабарларда ушбу намойиш натижасида 100дан ортиқ киши қўлга олингани хабар қилинганди. Париж полицияси бошлиғи Мишель Коддо шаҳардаги фавқулодда вазият тартибини бузган 300га яқин кишининг шахси аниқлангани ҳақида айтган.
Иқлим ўзгаришлари масалалари бўйича конференция Парижда 30 ноябрдан 11 декабрга қадар бўлиб ўтади. Унда дунёнинг 147 давлати раҳбарлари иштирок этади. Саммитда Киото протоколи ўрнига янги ҳужжат қабул қилиниши режалаштирилган.