Озод ва адолатли араб дунёсини қуриш орзулари чипакка чиқди, қўрқинчли тушга айланди, негаки яхши ташкил этилмаган замонавий либерализм диний радикалликдан устун кела олмади, деб ёзади The Wall Street Journal газетаси.
Роппа-роса 5 йил муқаддам, 2010 йилнинг 18 декабрь куни “араб баҳори” воқеалари бошланди. Ўшанда Тунисда бошланган норозиликлар қўшни давлатларга ҳам кўчди. Айни пайтда эса бу давлатларнинг ҳар бири “ўзича бахтсиз”.
Норозилик намойишлари авжига чиққан паллада диссидентлар “Араб баҳори орзулари” деган эссе чоп этишди, унда ўзлари кўраётган рисоладагидек араб дунёсини тасвирлаб беришди. Эсседа кўрсатилишича, бундай дунёда эркаклар ва аёлларнинг ҳуқуқлари тенг бўлади, худосизлар таъқибга учрамайди, ҳамжинсбозлар эса ўз жинсий эҳтиёжлари ҳақида эркин гапира олади.
Аммо фаолларнинг бу орзулари амалга ошмади. Мақола муаллифининг фикрича, Ғарб диний радикалларнинг кучи ва таъсирини тўғри баҳолай олмаган ва маҳаллий диктаторларнинг ағдарилиши экстремистик кайфиятларнинг йўқ бўлишига олиб келади, деб ўйлашган.
Жумладан, Оқ уй инқилоблар муваффақият билан якунланишига етарлича ёрдам бермади. Бунинг оқибатида араблар АҚШга бўлган ишончини йўқотиши мумкин.
Араб либерализми адептлари яна фаоллашишдан қўрқмоқда, негаки бу энди шариат қоидаларининг кенг жорий этилиши, аёлларга нисбатан қатағонлар, этник ва диний зиддиятларга олиб келишидан чўчимоқда, деб хулоса қилади таҳлилчи.