Эроннинг Iran Khodro компанияси Франциянинг PSA Peugeot Citroën автомобилсозлик компаниясидан Эронга нисбатан санкциялар амал қилган вақтдаги кўрилган зарар учун товон пули сифатида 427 млн евро олади, деб хабар бермоқда Lexpress нашри.
Бу ҳақда Iran Khodro раҳбари Ҳошим Якезаре маълум қилди.
Эрон компанияси 80 млн евролик қарздан озод қилинади, катта чегирмалар ва 25 млн евролик эҳтиёт қисмлар ҳам олади.
Peugeot вакили бу хабарга изоҳ беришдан бош тортди ва компаниялар ўртасидаги келишув "икки томон учун мақбул бўлганини" айтди.
Аввалроқ Peugeot Citroën ва Iran Khodro компаниялари Эронда автомобиллар ишлаб чиқариш бўйича қўшма корхона яратиш ҳақидаги келишувни имзолагани маълум қилинганди. Бу келишув Эрон президентининг Парижга сафари вақтида имзоланган.
Теҳронда жойлашадиган бу қўшма корхонанинг илк автомобиллари 2017 йилнинг иккинчи ярмида конвейердан чиқиши кутилмоқда.