АҚШнинг Қозоғистондаги элчиси Жорж Крол икки давлат ўртасида дипломатик алоқалар ўрнатилишининг 25 йиллиги муносабати билан берган брифингида бир йиллик фаолияти давомида кеч қолишни одат қилганини тан олди.
“Мен ҳақиқий қозоқман, - деди у. – Кеч қолиш жуда яхши нарса, мен бу анъанани ўргандим. Менга бу ёқади, негаки эркин халқнинг кўникмасидир”.
Шунингдек, у Остонадаги элчихона биноси марказий майдончасида ўрнатилган ўтов ичида меҳмон кутишини айтиб ўтди.
“Бу Қозоғистон тарихи... Ўтовнинг амалий устунлиги ҳам бор – ўтов тадбирлар ўтказиш учун кўп жой беради, ва барча дипломат дўстларим менга ҳасад қилади. Мен бу ўтовдан жуда фахрланаман”, - унинг сўзларини келтиради “Экспресс-К” нашри.
Шунингдек, Жорж Крол қозоқча гапиришни ўрганганини таъкидлади ва “Жаңа жылыңызбен!” деб журналистларни Янги йил, яъни Наврўз билан қутлади.
Эслатиб ўтамиз, Жорж Крол 2011-2014 йилларда АҚШнинг Ўзбекистондаги элчиси бўлган.