Нигерияда ҳаракат қилувчи "Боко Харам" террорчилик гуруҳи (2015 йилдан "ИШИДнинг Ғарбий Африка вилояти" деган ном олган) роппа-роса икки йил аввал – 2014 йил 14 апрелда Нигериянинг шимолидаги Чибок шаҳридаги мактаб-интернатдан ўғирлаб кетган қизларни қайтариш учун 35 млн фунт стерлинг талаб қилди. Бу ҳақда The Telegraph нашри хабар бермоқда.
Нашрнинг аноним манбаларга иқтибос келтирган ҳолда маълум қилишича, террорчилик гуруҳи етакчилари қизларни озод қилиш бўйича музокаралар ўтказиш таклифи билан Нигерия ҳукумати билан алоқага чиққан. Террорчилар қизларни озод қилиш учун 10 млрд нигерия найри (35 млн фунт стерлинг) талаб қилмоқда.
Бу орада қизларнинг баъзилари қочишга муваффақ бўлган. Бироқ қолган 219 нафар қизнинг тақдири ва жойлашган ўрни ҳанузгача номаълумлигича қолмоқда. Қизлар ўғирлангандан бир ойдан кейин террорчилар етакчиси Абубакр Шакайи асираларни Нигерия турмаларидаги бир неча сафдошларига алмашишга тайёрлигини айтган. Бу айирбошлаш Қизил хоч ташкилоти воситачилигида амалга оширилиши керак бўлган, бироқ Нигерия ҳукуматининг террорчиларни озодликка чиқаришни истамагани сабабли амалга ошмаган.
Ўтган йил бошидан бери Нигерия армияси террорчилик гуруҳига қарши бир қатор операциялар ўтказган ва уни Камерун чегарасига суриб чиқарган. Бу операциялар давомида 1000 дан кўпроқ аёл ва қизлар озод қилинган, бироқ Чибокдаги қизларни топишга муваффақ бўлинмаган.