Республикачи Дональд Трамп ноябрда ўтадиган президентлик сайловлари натижасида Оқ уйга келадиган бўлса, ўзининг маъмурияти таркибига партия бўйича аввалги рақибларини киритиши имкониятини кўриб чиқишга тайёр бўлади. Трамп бу ҳақда USA Today газетасида чоп этилган интервьюсида айтиб ўтди.
"Ҳа, менга Марко Рубио ёқади. Ҳа, уни киритган бўлардим", деб айтди республикачи номзодлар орасида етакчилик қилаётган Трамп ундан сайловларда ғалаба қозонса бошқа номзодларни ўз маъмурияти раҳбариятидаги лавозимларга таклиф қилиши мумкинлиги ҳақида сўралганда. Трамп бунда сайловолди пойгасидан чиқиб кетган, Флорида штатидан сенатор Марко Рубио ҳақида гапирди. Трамп, шунингдек, АҚШ президенти сифатида Огайо ва Висконсин штатлари губернаторлари, республикачилар Жон Кейсик ва Скотт Уокер билан ишлашга тайёрлигини айтган.
Трамп, шунингдек, вице-президент лавозимини кимга таклиф қилиш мумкинлиги ҳақида ўйлаётганини тасдиқлади. "Менда вице-президент борасида одамлар бор. Мен ҳеч кимга уларнинг кимлигини айтмаган", деб айтди Трамп.
АҚШ Республикачилар партиясининг умуммиллий қурултойи 18-21 июлда Кливлендда (Огайо штати) бўлиб ўтади, унда мамлакат президентига Республикачилар партиясидан расмий номзод қўйилади. Партиядан сайловда қатнашадиган номзод қурултойда иштирок этадиган 2472 делегатнинг 1237 нафарининг овозини олиши керак.