АҚШда ироқлик талабани телефон орқали араб тилида гаплашгани учун самолётдан тушириб юборишди. Бу ҳақда The New York Times хабар берган.
Воқеа Southwest Airlines авиакомпаниясининг Лос-Анжелесдан Оклендга йўл олаётган самолёти бортида содир бўлган.
Калифорниянинг нуфузли университетида таълим олувчи 26 ёшли Ҳайрулдин Маҳзумий Ироқдаги амакисига қўнғироқ қилган. Ўзининг айтишича, у амакисига шахсан БМТ бош котиби қатнашган тадбир хусусида сўзлаб бермоқчи бўлган. Лекин унинг ёнида ўтирган йўловчига Маҳзуми хатарли туюлган. Оқибатда экипаж аъзолари: “Сиз нега самолётда араб тилида гаплашдингиз?” деган савол билан самолёт бортини тарк этишни сўрашган.
“Исламофобия бу мамлакатни мана нима кўйларга солди”, - норозилигини маълум қилди Маҳзуми, у билан “худди ҳайвондек” муомила қилишганидан ранжиб.
Бу йил бошидан буён мусулмонлар билан Америка авиалинияларида содир бўлган еттинчи ҳолат ҳисобланади.