16-20 февраль кунлари Малайзиянинг Куала-Лумпур шаҳрида эркаклар, аёллар ва ёшлар ўртасида велоспорт-трек йўналиши бўйича Осиё Чемпионати ўтказилди. Бу ҳақда Ўзбекистон велоспорт федерацияси хабар тарқатди.
Ўзбекистон велосипед спорти терма жамоаси аъзоси Муроджон Ҳолмуродов қизғин кечган жангда Жаҳон кубоги ғолиби Қозоғистон велоспортчиси Панассенко Никита ҳамда Осиё Чемпиони Япония велоспортчиси Имамура Шунсукени ортда қолдириб, фахрли учинчи ўринни эгаллаб, бронза медалини қўлга киритди.
Мазкур Осиё Чемпионатида 1-ўринни эгаллаган Бирлашган Араб Амирликлари спортчиси Мирза Ал-Ҳамадий Юсуф Муҳаммад Аҳмад жорий йилнинг 6-12 февраль кунлари Мьянма давлатида “2018 Asian Road & Para Cycling Championships” велоспорт-шоссе йўналиши бўйича эркаклар, аёллар ва ёшлар ўртасида ўтказилган Осиё Чемпионатида олтин медаль соҳиби бўлган. 2-ўринни Гонконг велоспортчиси Cheung King Lok эгаллади, у ҳам жорий йил 6-12 февраль кунлари Мьянма давлатида “2018 Asian Road & Para Cycling Championships” велоспорт-шоссе йўналиши бўйича эркаклар, аёллар ва ёшлар ўртасида ўтказилган Осиё Чемпионатида яккалик пойгасида олтин медални қўлга киритган эди.
Бундан ташқари, Ўзбекистон велосипед спорти терма жамоаси аъзоси Евдокимов Данил ҳам ёшлар ўртасида Омниум баҳсларида маррага иккинчи бўлиб етиб келиб, кумуш медаль соҳиби бўлди. Давлатлар ўртасидаги натижалар қуйидагича бўлди: Корея - 1-ўрин, Ўзбекистон - 2-ўрин, Хитой тайпей - 3-ўрин.
