АҚШнинг авиасозлик ва автомобилсозлик компаниялари Хитой ва АҚШ ўртасидаги савдо урушидан энг кўп зиён кўради.
Boeing’нинг акциялари Нью-Йоркда савдолар бошланишидан олдин 5 фоизга, махсус техника ишлаб чиқарувчи Caterpillar компаниясиники 4 фоизга тушиб кетди. Ford, General Motors ва Fiat Chrysler компаниялари учун йўқотишлар 2,5 фоиздан 4 фоизгачани ташкил қилди. Tesla акциялари эса 5 фоиз йўқотган.
“Савдо уруши бошланиши хавотири пайдо бўлгандан кейин айтиб келингандек, саноатчилар энг кучли зарбани қабул қиладилар”, деб ёзмоқда Reuters.
Пекин ва Вашингтоннинг бож тўловлари киритиши ҳақидаги янгиликлар ортида Хитой индекслари сезиларсиз даражада пастлаган.
4 апрелда Хитой бозор қиймати 50 млрд долларга яқин бўлган, АҚШнинг 106 та маҳсулотига 25 фоизлик бож тўлови киритишга тайёрлигини маълум қилди. Бу божларнинг киритилиши АҚШнинг ҳаракатларига боғлиқ бўлади. Хитой бож киритадиган маҳсулотлар рўйхатида самолётлар, автомобиллар, соя, гўшт ва кимёвий моддалар айтиб ўтилган.
Хитой АҚШ 25 фоизлик бож киритиши мумкин бўлган 1,3 минг маҳсулотдан иборат рўйхат эълон қилинганига шу тариқа жавоб берган. Оқ уйда божлар кучга кириши санаси маълум қилинмаган.
