19 апрель куни Миллий матбуот марказида Ўзбекистон мустақил босма оммавий ахборот воситалари (ОАВ) ва ахборот агентликларини қўллаб-қувватлаш ва ривожлантириш жамоат фонди раҳбари Саид-Абдулазиз Юсупов иштирокидаги матбуот анжумани ўтказилди, унда 2017 йил якунлари бўйича ҳисобот берилди ҳамда келгусидаги режалар билан бўлишилди. Тадбирда қатнашган KUN.UZ мухбири шу ҳақида хабар берди.
Фонд раҳбарининг сўзларига кўра, ўтган йили асосий эътибор қуйидаги йўналишларни қўллаб-қувватлаш ва рағбатлантиришга қаратилган:
- мустақил босма ОАВ ва ахборот агентликларининг жамиятни демократлаштириш ва янгилаш;
- мамлакатни модернизация ва ислоҳ қилиш жараёнларини кенг ёритиш;
- кучли фуқаролик жамиятини барпо этиш;
- инсон ҳуқуқларини ҳимоя қилиш;
- жамоатчилик фикрини умумлаштириш ва ифода этиш;
- фуқароларнинг ҳуқуқий ва сиёсий маданияти, уларнинг ижтимоий ва сиёсий фаоллигини оширишда ОАВнинг ролини кучайтириш;
- босма нашрлар ва ахборот агентликлари материалларининг профессионал, ғоявий ва бадиий даражасини оширишга йўналтирилган лойиҳа ва дастурларни молиялаштириш;
- журналист ва техник ходимларни тайёрлаш ҳамда қайта тайёрлаш, уларнинг малакаси ва ижодий фаоллигини ошириш.
Буларнинг барини амалга ошириш мақсадида ҳисобот даврида Фонд томонидан Ўзбекистон Республикаси Олий Мажлиси ҳузуридаги Нодавлат нотижорат ташкилотлари ва фуқаролик жамиятининг бошқа институтларини қўллаб-қувватлаш жамоат фонди маблағларини бошқариш бўйича Парламент комиссияси томонидан ажратилган субсидиялар ҳамда Фонднинг ўз маблағлари ҳисобидан кўплаб лойиҳалар амалга оширилган. Саид-Абдулазиз Юсуповнинг маълум қилишича, ҳисобот даврида 70 дан зиёд йирик тадбирлар ташкил этилган ҳамда уларда 1700 дан ортиқ ОАВ вакиллари иштирок этишган.