АҚШ президенти Дональд Трамп Буюк Британия қироличаси Елизавета II билан илк марта учрашди. Таъкидлаб ўтиш жоизки, Трамп АҚШнинг зоти олиялари билан учрашган 12-президенти бўлди.
Қиролича Елизавета II жума куни ўзининг шаҳардан чеккадаги Беркшир графлигидаги Виндзор қасрида Трамп ва унинг рафиқаси Меланияни қабул қилди. Елизавета II ҳукмронлик қилган даврда Трамп АҚШнинг 13-президенти бўлиб турибди, лекин зоти олиялари президентлардан бири — Линдон Жонсон билан учрашмаган.
Бундан ташқари, АҚШнинг жорий маъмурияти раҳбари Британия монархи томонидан Виндзор қасрида кутиб олинган 4-президент бўлди. Унгача 1982 йилда Рональд Рейган, 2008 йилда кичик Жорж Буш ва 2016 йилда Барак Обама бундай «бахт»га муяссар бўлишган.
Ҳозирча бу давлат ташрифи эмас
Илгари Трамп Буюк Британияда давлат ташрифи билан келиши ва шундай мақомдаги ташрифлар учун мўлжалланган Британия монархининг Лондондаги қароргоҳи Букингҳэм саройида тўхташи кутилаётган эди. 2017 йилда Трампнинг инаугурацияси чоғида Британия бош вазири Тереза Мэй Вашингтонга бориб, хорижий давлат етакчилари ичра биринчи бўлиб янги президент билан юзма-юз гаплашган ва уни лавозимига киришгани билан табриклаган эди. Ўшанда у қиролича Елизавета II номидан мамлакатга давлат ташрифи билан келиш учун таклифнома келтирган эди. Бу эса анъаналарга зид келарди. Чунки давлат ташрифидан олдин АҚШ президентининг ишчи ва расмий ташрифи бўлиб ўтиши керак эди.
Натижада Трампнинг сиёсий линиясини маъқулламайдиган 1,86 миллион британиялик ташрифнинг олий мақомини бекор қилиш ҳақида петиция остига имзо тўплашди. Гарчи Британия парламенти жамоавий мурожаат муаллифларига пешвоз чиқмаган эса-да, ташриф формати вақт ўтиши билан чиндан ҳам ишчи ташрифга алмаштирилди, лекин бунинг сабабини ҳеч ким ойдинлаштирмади.
