Canon компанияси ўзининг янги фотоаппаратини намойиш этди. Камера ихчам бўлиб, унда селфи ва 4К шаклдаги видео олиш мумкин.
Canon PowerShot SX740 HS 20,3 мегапикселли CMOS-сенсор, 40 мартагача яқинлаштирувчи объектив ҳамда селфи олиш учун қулай бўлган юқорига кўтарилувчи дисплей билан жиҳозланган.
Камера Wi-Fi ва Bluetooth’га уланиш имкониятига эга. Бу эса унинг iOS ёки Android қурилмалари билан мунтазам алоқада бўлишини, фотосуратларга GPS координаталарини муҳрлаш имконини таъминлайди.
Canon PowerShot SX740 HS қора ва кумушранг тусда чиқарилади. У август ойидан 400 доллар нархда сотувга чиқади.