Ўзбекистон Республикаси Президенти ҳузуридаги тадбиркорлик субъектларининг ҳуқуқлари ва қонуний манфаатларини ҳимоя қилиш бўйича Вакил девони (Бизнес-Омбудсман) томонидан тўловларни қабул қилишда воситачилик фаолияти билан шуғулланувчи якка тартибдаги тадбиркорларнинг сотилган товар ва хизматлар бўйича жами тушумидан ягона солиқ тўлови қўлланилишидан улар солиқ тўлашда кийинчиликларга дуч келаётганлиги юзасидан йўллаган жамоавий мурожаати кўриб чиқилди.
Аниқланишича, якка тартибдаги тадбиркорлар шартнома асосида фаолият юритувчи тўлов шахобчалари орқали агент сифатида жисмоний шахслардан тўловларни қабул қилиш учун мавжуд хизматларни етказиб берувчилар фойдасига воситачилик хизматини кўрсатадилар ва тўлов асосида хизмат кўрсатувчи агентлар кўрсатилган хизматлар учун мукофот сифатида даромад оладилар.
Бугунги кунда Республикада “UZPAYNET” масъулияти чекланган жамиятида тўлов агентлари сифатида 4,5 мингдан ортиқ якка тартибдаги тадбиркорлар фаолият юритади.
Амалдаги қонунчиликка биноан, якка тартибдаги тадбиркорларнинг календарь йил давомида тушган тушуми миқдори 100 млн. сўмдан ошган тақдирда
4 фоизли ставка бўйича ягона солиқ тўловига ўтади.
Шу билан бирга, тўлов агентларига тушган тушумдан 4 фоизли ставка бўйича ягона солиқ тўловига тортиш механизмининг қўлланилиши якка тартибдаги тадбиркорлар сонининг қисқаришига ва фаолиятини тўхтатиш ҳолатларига ошишига олиб келади. Шунингдек, мазкур соҳада хуфёна фаолият юритаётган тадбиркорлар сонининг ошишига сабаб бўлади.
Юқоридагиларга кўра, Бизнес-омбудсман томонидан мазкур соҳада вужудга келаётган муаммони бартараф этиш мақсадида тегишли норматив-ҳуқуқий ҳужжат лойиҳаси ишлаб чиқилиб, Ўзбекистон Республикаси Президенти Администрациясига киритилди.
Мазкур ҳужжатнинг амалга киритилиши 4,5 мингдан ортиқ тўлов агентларига ўз фаолиятини янада ривожлантириш имконини бериб, PAYNЕT тўлов тизими орқали турли хил тўловларни амалга ошириш мамлакат аҳолиси учун янада қулайликлар яратади.
