Тамаки маҳсулотларининг ноқонуний айланмасига чек қўйиш, акциз маркасиз ёхуд бошқа давлатларнинг акциз ёрлиғига эга бўлган тамаки маҳсулотларининг олиб кирилишини олдини олиш божхона органлари зиммасига юкланган муҳим вазифалардан бири ҳисобланади.
Тошкент вилояти божхона бошқармаси ходимлари томонидан тамаки маҳсулотларининг божхона чегаралари орқали ноқонуний олиб ўтилишига ва ички ҳудудда ноқонуний айланмасига қарши кескин чоралар кўрилмоқда. Шунга қарамай бундай ҳолатлар ҳали ҳамон учраб турибди.
Ана шундай ҳолатлардан бирига Тошкент вилояти божхона бошқармаси Контрабанда ва божхона қонунчилиги бузилишига қарши курашиш бўлими ходимлари бошқа ҳуқуқни муҳофаза қилувчи органлар билан ҳамкорликда ўтказилган тезкор тадбир давомида чек қўйишди.
Тезкор тадбир давомида Бекобод шаҳрида Қ.Д., С.О. лар қўшни давлат билан чегарадош ҳудудидан 118 миллион сўмлик 9500 қути тамаки маҳсулотларини ноқонуний тарзда олиб кираётганларида тўхтатиб қолинди.
Шунингдек, “Ойбек” чегара божхона пости ходимлари томонидан қўшни давлатдан пиёда ҳолда кириб келган фуқаро Ф.З. нинг қўл юклари белгиланган тартибда божхона кўригидан ўтказилди. Натижада, ушбу шахснинг юклари орасидан йўловчи божхона декларациясида ёзиб кўрасатилмаган ва оғзаки сўровда тақдим қилинмаган, қиймати 1,5 миллион сўмлик 130 дона қути тамаки маҳсулотларини олиб кириш вақтида тўхтатиб қолинди.
Яна бир ҳолатда “Бекобод” темир йўл чегара божхона пости ходимлари томонидан аниқланди. Қўшни давлатдан “Бекобод” темир йўл бекати орқали транзит йўловчи поездида кириб келган фуқаро Қ.М. оғзаки сўровдан сўнг қўл юклари холислар иштирокида божхона кўригидан ўтказилди. Натижада унинг юклари орасидан божхоначиларга маълум қилинмаган 1,3 миллион сўмлик 130 қути тамаки маҳсулотлари борлиги фош этилди.
Ҳозирда юқоридаги ҳолатлар юзасидан божхона текширувлари давом эттирилмоқда.
