Халқаро хоккей федерацияси (IIHF) россиялик ҳужумчи Евгений Кузнецовни антидопинг қоидаларини бузгани учун 4 йилга дисквалификация қилди.
Қайд қилинишича, Евгенийнинг 2019 йилги жаҳон чемпионатида топширган допинг-намунаси ижобий натижа берган. 26 май куни ўтказилган Россия – Чехия баҳсидан кейин олинган допинг-намунада тақиқланган кокаин гиёҳванд моддаси қолдиғи топилган.
Россиялик хоккейчи бунга эътироз билдирмаган ва В допинг-намунанинг ҳам очиб кўрилишини талаб қилмаган. Энди у 2023 йил 12 июнь кунигача музга тушолмайди.
Кузнецов Россиянинг энг кучли хоккейчиларидан бири ҳисобланиб, 2014 йилдан бери АҚШнинг «Вашингтон Кэпиталз» клуби шарафини ҳимоя қилмоқда. У жаҳоннинг икки карра (2012, 2014) чемпиони, Стэнли Кубоги (2018) соҳиби, ёшлар ўртасида жаҳон чемпионидир (2011).
2019 йилги жаҳон чемпионатида Россия миллий жамоаси таркибида бронза медалини қўлга киритган.
