Россия миллий жамоаси мураббийи Станислав Черчесов ўзи билан боғлиқ қизиқ воқеани айтиб берди. «Спорт экспресс» нашрига берган интервьюсида айтишича, Черчесовга бир мухлис қўнғироқ қилиб нега Элдор Шомуродовни миллий жамоага чақирмайсан, деб айтган.
«Бир мухлис қаердандир рақамимни топиб, қўнғироқ қилди. У узоқ монолог сўзлади: «Сен унақа, сен бунақа, ҳақиқий талантларни кўрмайсан, чемпионат тўпурари бўлиб турган Шомуродовни жароҳатланган Смолов ўрнига чақирсанг бўларди-ку», деди. Мен эса сиз тўғри гапиряпсиз, лекин Ўзбекистон миллий жамоаси ҳужумчисини Россия миллий жамоасига чақира олмайман деб айтдим.
Афсуски, суҳбатдошимнинг юзини кўра олмадим, лекин у худди гроссмейстерларга ўхшаб пауза сақлади. Ҳазил ўз йўлига, лекин эҳтирос баъзан ақлни четга суриб қўйиши бор гап»,— деб Черчесовнинг сўзларини келтирмоқда «Спорт экспресс».
