Михаил Дегтярёв ўлка ҳукумати олдида йиғилаётган барчани «бор кучларини яхшиликка сарфлаш» ва «ёлғиз инсонларга озиқ-овқатлар етказиб бериш»га чақирди.
Хабаровск ўлкасининг вақтинчалик губернатори Михаил Дегтярёв «дераза остида қичқираётган» намойишчилар олдига чиқмаслигини айтди. У бу ҳақда Би-би-си мухбирига айтган.
«Чиқмайман! Одамлар олдига доим чиқаётганимни айтдим. Одамлар билан мулоқот қиламан – фақат тўғри шаклда. Шифокорлар билан, мижозлар билан, сиз билан, масалан... Лекин мана бундай ўртоқларнинг талаби билан... Бу нимаси? Бу на менга, на аксарият россияликлар овоз берган президентга ҳурматсизлик. На ўзига», — деди Дегтярёв.
Дегтярёв ўлка ҳукумати олдида йиғилаётган барчани «бор кучларини яхшиликка сарфлаш» ва «ёлғиз инсонларга озиқ-овқатлар етказиб бериш»га чақирди.
«Дераза остида қичқиришлар етар! Келинг, бирга ишлайлик, кейин кўрамиз. Бизда 22 млрд рубллик чала қурилишлар бор. Раҳбарнинг дераза остида қичқираётганлар билан гаплашишдан бошқа ишлари бор», — деб таъкидлади у.
Дегтярёв Сергей Фургалнинг ўрнига Хабаровск ўлкаси губернаторлигини вақтинча бажарувчи этиб тайинланганди. Фургал 10 июлда қотилликка алоқадорликда айбланиб ҳибсга олинганди. Фургал ҳибсга олинганидан буён Хабаровскда намойишлар бўлиб ўтмоқда.
