АҚШда юқори мансабдор шахслар устувор тартибда коронавирусга қарши биринчи бўлиб эмланадилар. ОАВ маълумотларига кўра, эмлаш таклиф қилинадиган мансабдор шахслар орасида президент Доналд Трамп ва вице-президент Майк Пенс бўлади.
Оқ уй ҳузуридаги Миллий хавфсизлик кенгаши матбуот хизмати вакили Жон Эллиотнинг таъкидлашича, 14 декабрдан бошлаб барча юқори мансабдор шахслар, жумладан, Оқ уйнинг баъзи вакиллари Pfizer ва BioNTech компанияларининг вакцинаси билан эмлашдан ўтади.
Бироқ Оқ уйда октябрда коронавирусни бошдан ўтказган Трамп эмланиши борасида аниқлик киритилмаган. Bloomberg ахборот агентлигининг манбаларга таяниб хабар беришича, АҚШ президентига устувор тартибда эмланиш таклиф қилинади.
Шу билан бирга, АҚШдаги президент сайловлари ғолиби Жо Байден ва унинг жамоаси аъзоларига эмлаш таклиф қилиниши ёки йўқлиги номаълум.
Маълумотларга кўра, АҚШ раҳбарияти барча амалдорлар вакцинанинг иккиламчи таъсирларини бир вақтда ҳис қилмасликлари учун 10 кун давомида эмланади.
АҚШ маъмуриятида таъкидланишича, АҚШ раҳбариятининг биринчилардан бўлиб эмланиши америкаликларни Pfizer ва BioNTech вакцинасининг хавфсиз эканига ишонтиради.
“Америка халқи АҚШнинг юқори мансабдор шахслари оладиган хавфсиз ва самарали вакцинани олишига ишончи комил бўлиши лозим”, деб айтган Эллиот.
Аввалроқ АҚШдаги эмлаш дастури Warp Speed’га раҳбарлик қилаётган генерал Густав Перна 14 декабрдан АҚШдаги эмлаш марказларига Pfizer ва BioNTech вакцинаси етказилиши бошланишини маълум қилганди. Маълумотларга кўра, эмлашнинг илк ҳафтаси эмлаш марказлари орасида 2,9 млн доза вакцина тақсимланади, йил охиригача эса 40 млн америкаликни эмлаш режалаштирилган.
