Қозоғистон президенти Қосим-Жомарт Тўқаев МДҲ саммитида коронавирусга қарши кураш бўйича амалга оширилаётган ишлар ҳақида гапириб ўтди.
Келгуси ҳафта Қозоғистонда Россия билан янги коронавирусга қарши, шу жумладан экспорт учун вакциналарни биргаликда ишлаб чиқариш йўлга қўйилади. Бу ҳақда республика президенти Қосим-Жомарт Тўқаев жума куни МДҲ давлат раҳбарлари кенгаши мажлисида айтиб ўтди.
«Қозоғистон коронавирусга қарши ўз препаратини ишлаб чиқмоқда, у синовлар пайтида яхши натижалар кўрсатди. Келаси ҳафта Россия билан биргаликда вакциналар ишлаб чиқаришни йўлга қўямиз. У ҳам Россиянинг, ҳам Қозоғистоннинг вакцинаси бўлади, экспортга ҳам чиқарилади», - деди у.
Тўқаев МДҲ салоҳиятини янги геосиёсий шароитларга мослаштириш ишларини кучайтириш зарурлигини маълум қилди.
«Менимча, бизнинг умумий вазифамиз - Ҳамдўстлик салоҳиятини янги геосиёсий шароитда янада мустаҳкамлаш, халқаро майдондаги мавқейини кучайтириш», - деди у.
Тўқаев, шунингдек, яхши қўшничилик, ўзаро ҳурмат ва манфаатларни инобатга олган ҳолда иш кўриш МДҲ давлатларига ҳозирги синовларни муносиб енгиб ўтишда ёрдам беришини билдирди.
