НАТОга аъзо давлатлар коронавирусга қарши у ёки бу вакцинани харид қилишни ўзлари мустақил ҳал қилишлари лозим. НАТО бош котиби Йенс Столтенберг алянсга кирувчи баъзи давлатлар Россиянинг «Спутник V» вакцинасини сотиб олишга қарор қилганига шундай изоҳ берди.
«Иттифоқдошларимиз қандай вакцинани қўллаши кераклигини НАТО тавсия қилиши керакмас. Бу уларнинг шахсий ишидир», деб маълум қилган Столтенберг журналистларга. Унинг айтишича, кўплаб давлатларда катта кўламли эмлаш кампаниялари олиб борилаётганига қарамай, дунёда ҳамон вакциналарга эҳтиёж кузатилмоқда.
Айни вақтда «Спутник V» вакцинаси умумий аҳолиси 3 млрддан кўпроқ одамни ташкил қиладиган 60та давлатда рўйхатдан ўтказилган. Ушбу воситани харид қилиш истагини НАТОнинг бир қатор давлатлари, жумладан, Венгрия, Германия, Италия, Туркия, Франция ва Чехия билдирган.
