Кеча, 29 апрел куни АОКАда умумтаълим мактабларининг АКТ билан таъминланганлик ҳолати юзасидан матбуот анжумани ташкил этилди.
Тадбирда мактаб ўқитувчиларидан бири айрим ҳудудларда ўқитувчилар мактабга қабул ёшидаги ўқувчиларнинг маълумотларини уйма-уй юриб ўрганишга мажбур бўлаётгани ҳақидаги савол билан мурожаат қилди.
«Пандемия шароитида шу тўғрими? Ўзи умуман, нега бу жараён рақамлаштирилмаган? Ўқитувчи ўзининг ишини қилсинми ё маълумот йиғсинми?» – деди савол эгаси.
Ҳолат юзасидан халқ таълими вазири ўринбосари Рустам Каримжонов изоҳ берди.
«Бунинг асосий сабабларидан бири – бизда ҳозир тўлиқ база йўқ. Мактаб ўқитувчиларининг тўлиқ актуал базаси йўқ. Бу бўйича 2020 йилдан бошлаб ягона тизим ишлаб чиқяпмиз. Бу борада 9 та вазирлик билан бирга интеграция ишлари олиб бориляпти.
Бунда тўғри маълумотлар базаси йиғиляпти. Масалан, Адлия вазирлигида туғилганлик ҳақида маълумотнома бўлади. Биз шу орқали маълумотларни янаям аниқлаштирамиз. Ҳозирги кунда ушбу базага 2 млн.га яқин ўқувчи маълумотлари юкланди.
Шунингдек, базага ўқитувчилар маълумоти ҳам юкланяпти. Ўқитувчи ва ўқувчи бир мактабдан иккинчисига ўтса, биз буни биламиз. Мана шундан кейин ўқитувчилар томонидан қўлда қоғоз йиғиш ҳолатлари йўқолади», – деди вазир ўринбосари.
