AstraZeneca ЕИга июн охиригача етказилиши керак бўлган 300 млн доза вакцина ўрнига 50 млн дозадан камроқ вакцина етказиб берди.
Евроиттифоқ судда AstraZeneca Британия-Швеция компаниясидан сентябр охиригача 300 млн доза вакцина етказиб беришни талаб қилди. Бу ҳақда Reuters агентлиги Евроиттифоқ адвокатига таяниб хабар берди.
Апрелда Еврокомиссия шартномани бажармагани учун компанияни судга берди. Компания биринчи чоракда шартномадаги 120 млн доза ўрнига 40 млн дозага яқин вакцина етказиб берди, июн охиригача етказилиши керак бўлган 300 млн доза вакцина ўрнига эса 50 млн дозадан камроқ вакцина етказиб берди. Бу ЕИнинг қатор мамлакатларида коронавирусга қарши эмлаш кампаниясининг издан чиқишига сабаб бўлди.
Жорий йил март ўртасида Еврокомиссия раҳбари Урсула фон дер Ляйен Европа иттифоқида коронавирус билан боғлиқ вазият ёмонлашгани, янги штаммлар пайдо бўлганини маълум қилган. У буни аҳолини эмлаш суръатлари пасайгани билан боғлаган ва бунда AstraZeneca’ни айблаган.
Ҳозирда Европа иттифоқида Pfizer, Moderna, AstraZeneca ҳамда Janssen вакциналарини қўллашга рухсат берилган.
