Вилоят ҳокими Хайрулло Бозоров, Фарғона вилоятида йирик қуёш электр станциясини барпо этишни режалаштираётган Хитойнинг Liaoning Lide компанияси делегациясини қабул қилди.
Учрашувда вилоят ҳудудида лойиҳа тахминий қиймати 700 миллион АҚШ долларига етадиган, қуввати 1200 МВтгача бўлган йирик қуёш электр станциясини барпо этиш лойиҳаси муҳокама қилинган. Бу ҳақда вилоят ҳокимлиги ахборот хизмати хабар қилмоқда.
Қайд этилишича, компания бошқарув кенгаши раиси ўринбосари Чжан Цзинминь, лойиҳалар департаменти раҳбари Сяо Чунхунь ҳамда Ўзбекистон филиали директори Чжоу Жунькан билан бўлган мулоқот чоғида Хитой компанияси томонидан вилоят ҳудудида лойиҳа тахминий қиймати 700 миллион АҚШ долларига етадиган, қуввати 1200 МВтгача бўлган йирик қуёш электр станциясини барпо этиш лойиҳаси муҳокама қилинган.
Х.Бозоров Фарғонада амалга оширилиши режалаштирилаётган лойиҳада ҳам киловатт-соат электр энергияси нархи “Masdar” ва “Total Eren” томонидан таклиф этилган тарифлар атрофида бўлиши кераклигига эътибор қаратган.
Хитойлик меҳмонлар, Фарғона водийсидаги қайта тикланадиган энергетиканинг биринчи лойиҳаси учун банк кредитлари эмас, тўғридан тўғри инвестициялар жалб этиш режалаштирилганини маълум қилиб, ишлаб чиқарилган электр энергиясини 25 йил муддатда сотиб олиши учун “Ўзбекистон миллий электр тармоқлари”га энг мақбул тарифларни тақдим этишга тайёр эканликларини билдиришган.
Аввалроқ вилоят ҳокими Латвиянинг Ахборот тизимлари менежменти Олий мактаби президенти билан учрашгани ҳақида хабар берилган эди.
