Аргентиналик судья Мартин Бава Аргентинанинг собиқ президенти Маурисио Макрини ноқонуний кузатув олиб бориш иши бўйича сўроққа чақиртирди ва унга мамлакатни тарк этишни тақиқлаб қўйди. Бу ҳақда La Nacion нашри маълум қилди.
Тергов маълумотларига кўра, Аргентинанинг федерал разведка агентлиги 2017-2018 йилларда “Сан Хуан” сувости кемаси экипажи аъзоларининг қариндошлари ортидан кузатув олиб борган. Кема 2017 йил ноябрда чўкиб кетганди.
Судьянинг таъкидлашича, кузатув олиб бориш борасида қарор қабул қилиш учун жавобгарлик нафақат разведка, балки Аргентинанинг ўша вақтдаги президенти Макри зиммасида ҳам ётади.
Макри судга 7 октябрда келиши белгиланган. Айни вақтда у АҚШда қолмоқда.
Бортида 44 киши бўлган “Сан-Хуан” сувости кемаси 2017 йил 15 ноябрда алоқага чиқмай қўйган. Кема йўқолган кун экипаж қўмондонликка кеманинг аккумулятор бўлмасига сув киргани, бу қисқа туташувга ва унинг натижасида ёнғинга олиб келганини маълум қилган.
Кемани қидиришда 18 та давлат кемалари ва авиацияси иштирок этган. АҚШнинг Ocean Infinity хусусий компанияси кемани бир йил ўтгач, 2018 йил ноябрда 907 метр чуқурликда аниқлаган.
Маурисио Макри Аргентинага 2015 йил декабрдан 2019 йил декабргача президентлик қилган.
