«Олтин тўп»ни топшириш маросимига оз қолмоқда. Эртага, 29 ноябрь куни Парижда «France Football» йилнинг энг яхши футболчисини аниқлайди. Совринга номзод 10та футболчи маълум қилинган. Лекин очиғини айтганда, уларнинг ҳаммаси ҳам яққол даъвогар эмас. Тўғри, 2021 йилги мавсумда жуда кўплаб футболчилар ушбу совринга лойиқ ўйин кўрсатгандек бўлишди. Бироқ барибир биз ҳақиқий фаворитларни биламиз. Tribuna.uz аввалроқ Роберт Левандовскининг 2021 йилдаги ҳаракатларига баҳо берганди. Энди навбат польшалик футболчининг энг катта ва хавфли рақобатчиси Лионель Мессига. Лео учун ушбу йилда содир бўлган қайси воқеалар плюс, қайсилари минус вазифасини ўтади? Бирма-бир кўриб чиқамиз. Бошладик...
Плюс: Месси Ла Лига қироли
Месси 2020/2021 йилги мавсумни яхши бошламади. Лекин «Олтин тўп» 2021 календар йили учун топшириладиган соврин. Мавсум бошидан 31 декабрь санасига қадар Лео 7та гол ва биттагина ассист амалга оширишга муваффақ бўлганди. 2021 йил эса Месси жуда катта тезлик олди. Мавсум якунига қадар аргентиналик футболчи 23та гол уришга эришди. 8-маротаба Пичичи совринини қўлга киритди ва бу унинг кетма-кет 5-марта ушбу совринни қўлга киритиши эди. Бўлдими? Йўқ! Месси марказий ҳужумчи эмаски, унинг ҳаракатларини голлар билангина ўлчасак. У бутун бошли рақиб майдони бўйлаб кенг кўламда ҳаракат қилади. Мавсум якунига қадар у Ла Лигада яна 8та голли узатмани амалга оширди. 77та хавфли ҳужум (Ла Лигада энг яхши) ва 22та ўта хавфли вазият (Ла Лигада энг яхши) яратишга эришди. Бундан ташқари, 33 ёшли Месси 1 январдан мавсум якунигача 159 маротаба рақибларини муваффақиятли алдаб ўтди ва бу борада Ла Лигадаги ҳеч ким унга тенг кела олмайди.
«Барселона» Ла Лигани ютқазди. Лекин индивидуал кўрсаткичлардан кўриб турибмизки, Месси жамоаси ғалабаси учун қўлидан келган ишни қилган. Қолгани Рональд Куман ва жамоадошларининг вазифаси эди.
Аргентина эса Мессининг ажойиб ўйинлари ёрдамида 1993 йилдан буён илк марта катта мусобақа ғолиблигига эришди.
Минус: Клуб миқёсида катта соврин йўқ
Ўтган мавсумни ҳам Ла Лига совринисиз ўтказган Месси фаолиятида иккинчи марта кетма-кет иккита лига чемпионлигини бой берди. Биринчи марта у 2007 ва 2008-йилги мусобақаларда ҳам кетма-кет чемпионликдан четда қолиб кетганди. Бундан ташқари, Месси яна Чемпионлар Лигасида ғалаба қозонмади. Лео қаторасига 6-мавсум «шалпангқулоқ»ни қўлга кирита олмади. «ПСЖ»га қарши учрашувда Усмон Дембеле кўплаб вазиятларни кўкка совурди. Мессининг ўзи ҳам пенальтини голга айлантира олмади.
Шунингдек, Ла Лига доирасида «Реал»га қарши ўйинларда ҳам гол ура олмади. Балки, Месси «Альфредо ди Стефано» стадионида мадридликлар дарвозасига йўл топа билганида «кўк-анорранглилар» лига титули учун курашга қўшилармиди?
Плюс: У индивидуал жиҳатдан тенгсиз
Биз Чемпионлар Лигасида омадсиз ўйнади, деб айтаётган Мессининг ушбу турнирдаги индивидуал кўрсаткичларига эътибор беринг:
- 6та ўйин
- 5та гол
- 2та ассист
- Ҳужум учлигига 224та аниқ пас
- 29 марта муваффақиятли алдаб ўтиш
- 23та ўта хавфли вазият
Шуни таъкидлаб ўтиш керакки, Месси бошқа типдаги футболчи. У юқоридаги голларидан ташқари ҳам майдонда жуда катта кўламли ишни амалга оширади. Буни унинг собиқ жамоадоши Жерар Пике ажойиб изоҳлаганди.
«Менимча, Месси «Олтин тўп»ни қўлга киритади. Ушбу совриннинг параметрлари Леонинг ўйин услубига жуда мос. У универсал футболчи сифатида майдонда катта ишни бажаради».
Леонинг бу йўлдаги катта рақобатчиларидан бири Жоржиньо ҳам Мессини соврин йўлида фаворит, деб билади.
«Агар «Олтин тўп» титулларга қараб бериладиган соврин бўлса, у меники бўлиши керак. Лекин у йилнинг энг яхши футболчисига топширилиши лозим бўлса, бу — Месси. Жамоавий совринлар ва шахсий кўрсаткичлар инобатга олинса ҳам, барибир Месси дейман».
Минус: Париждаги беқарорлик
Йилни «Барселона» ва Аргентинадаги темпида якунлай олган тақдирда, Мессининг «Олтин тўп»ни олишига ҳеч ким тўсқинлик қила олмасди. У Парижга ўзи хоҳламасдан келгани тушунарли. Баъзи ўйинларда ўзини эслагандек ҳам бўлмоқда. Лео профессионал фаолиятида биринчи марта «Барселона»дан бошқа клуб шарафини ҳимоя қилмоқда. Йил сўнгини муваффақият билан тугата олмаслик уни «Олтин тўп»дан маҳрум қилиши мумкин.
Балки шу ҳолатда ҳам, Мессини йилнинг энг яхши футболчиси сифатида кўришимиз мумкиндир. Лекин одамлар аргентиналикдан бошқа футболчига ҳам ушбу совриннинг берилишини хоҳлаганлари учун ҳам бошқа футболчи унвонга эга чиқиб кетиши мумкин. Айниқса, 2020 йилги «Олтин тўп»нинг бекор қилиниши оқибатида мухлисларда Левандовскига ачиниш ҳолати шаклланиб қолган. Мессининг мухлислари 2013 йилги «Олтин тўп» ҳам одамлар зериккани учун Роналдуга бериб юборилган, деб билишади. Лекин бу факторга қарши Лео қўлга киритган совринлар борасидаги шубҳаларни ҳам келтириш мумкин.
Хулоса
Месси учун ушбу соврин у қадар катта аҳамиятга эга эмас. У кўп йиллик орзусига эришган бир пайтда, ҳисобида 6та бўлган тилладан ясалган тўпнинг навбатдагиси қанчалик аҳамиятли бўлиши мумкин? Ўз навбатида шуниси ҳам аниқки, ҳеч бир футболчи Месси ўйнаган типда ҳаракат қила олмайди. У каби жамоага фойда келтира олмайди. Левандовски қанча кўп гол урса ҳам, Жоржиньо АПЛни ютса ҳам Месси бўла олмайди. Леонинг ўйинини ҳеч қачон бошқа футболчилар билан солиштириб бўлмайди. Унинг кўрсаткичлари фақат ўтган йилги натижалари билан солиштирилади. Шуниси аниқки, аргентиналик 33 ёшли футболчи индивидуал жиҳатдан ҳеч қайси футболчидан ортда қолмайдиган мавсум ўтказди.
Абдулвосид Валихонов тайёрлади.
