Қишки таътилнинг узайтирилгани 1–2-курс талабалари учун ўқув йили давомийлигига деярли таъсир қилмайди.
Фото: KUN.UZ
Олий ва ўрта махсус таълим вазири ўринбосари Комилжон Каримов қишки таътилнинг 24 январгача узайтирилгани ўқув йили давомийлигига қандай таъсир қилиши бўйича изоҳ берди.
"Таътилнинг узайгани 1–2-курслар ўқув йили муддатига катта таъсир қилмайди. Чунки янги модул тизимимизда ўқув йили давомийлиги эски тизимга нисбатан анча қисқарган. Илгариги тизимда 38-40 ўқув ҳафтаси бўлган бўлса, бугунги кунда 30 ҳафта. Ўқув биринчи семестрда 15 ҳафта, иккинчисида 15 ҳафта давом этади", - деди у Халқаро пресс-клубнинг навбатдаги сессиясида.
Вазир ўринбосарининг айтишича, 1–2-курс талабалари ўқишни 3–4-курсларга нисбатан вақтлироқ тугатади. Уларнинг ўқиш муддати июн ойига бормасдан якунига етади.
