Ўзбекистон шаҳарларидан Олмаота, Ақтўбе ва Ақтауга парвозлар қайта йўлга қўйилмоқда.
Uzbekistan Airways авиакомпанияси матбуот хизмати хабарида қайд этилишича, 2022 йил 15 январдан бошлаб, авиакомпания Тошкент—Олмаота—Тошкент, Самарқанд—Олмаота—Самарқанд, Нукус—Ақтўбе—Нукус, Урганч—Ақтау—Урганч, Нукус—Ақтау—Нукус, Урганч—Ақтау—Урганч, Нукус—Ақтау—Нукус йўналишлари бўйича мунтазам авиақатновларни қайта йўлга қўяди.
Таъкидланишича, Олмаота халқаро аэропорти халқаро қатновларни соат 08:00 дан 21:00 гача (Олмаота вақти билан) қабул қилади. Ушбу муносабат билан Тошкент—Олмаота—Тошкент йўналиши бўйича HY–765/766 қатнови 16 январь куни бекор қилинади, мазкур парвоз йўловчилари 17 январь куни Тошкент—Олмаота—Тошкент йўналиши бўйича HY–763/764 авиақатнови орқали манзилга етказилади.
Маълумот учун, Олмаота ва Ақтўбе, Ақтау шаҳарларида бекор қилинган (2022 йил 7-13 январ кунлари) қатновлар йўловчилари авиачиптанинг тўлиқ қийматини харид қилинган жойда қайтариб олиш ёки исталган бошқа бўш санага бепул қайта брон қилиш ҳуқуқига эга.
Эслатиб ўтамиз, Қозоғистондаги намойишлар туфайли дастлаб 5 январь кунидан Ақтауга мунтазам парвозлар бекор қилинди. Кейинроқ Олмаота ва Ақтўбега режалаштирилган парвозлар ҳам амалга оширилмади.
