«Мен умуман ёқтирмаган одамлар мендан нафратланиши қандай бахт», деган Россияни тарк этган қўшиқчи.
Россиялик қўшиқчи Алла Пугачёва «ундан нафратланган» одамларга «қароллар эди, қулга айланди» деган сўзлар билан мурожаат қилди. Тегишли пост Пугачёванинг ижтимоий тармоқдаги саҳифаларида 4 октябр, сешанба куни эълон қилинган.
«Худойим! Менга умуман ёқмаган одамлар мени ёмон кўришлари қандай бахт. Агар улар мени ёқтирганида, бу қўшиқ айтиб, беҳуда яшаганимни билдирар эди. Сабаби аниқ. Тишларини қайрашда давом этишсин. Қароллар эди, қулга айланишди», - деб ёзган Пугачёва. У сўзлари айнан кимга қаратилганига аниқлик киритмади.
Аввалроқ Пугачёва ўзини танқид қилган режиссёр Никита Михалковга ўзининг «Муҳаббат қули» фильми бош қаҳрамонининг сўзлари билан жавоб қайтарган эди: «Жаноблар, сиз ўз давлатингиз лаънатига учрайсиз, аскар».
Сентябрь ойи охирида Кремлга яқин ҳисобланувчи «Известия» ва «Пятый канал» нашрлари август ойида Россияга қайтган Пугачёва яна мамлакатни тарк этгани ҳақида хабар берган эди. Хонанданинг ўзи, унинг вакили ва эри Максим Галкин бу маълумотга изоҳ бермади.
Mash Telegram-канали Пугачёванинг Россияга Москва областидаги уйини сотувга қўйиш учун келганини иддао қилди. Шундан сўнг, Telegram’даги ташвиқот каналлари Москвадаги «Останкино» телемарказида олинган видеони тарқатишди, у ерда деворга «Алла, нега умуман келдинг?» деган сўзлар ёзиб қўйилган.
Сентябрь ойида Пугачёва Россия Адлия вазирлигидан бир кун аввал «хорижий агентлар» реестрига киритилган Максим Галкин ортидан ўзини ҳам «хорижий агент» деб эълон қилишни сўраганди. У ўз мурожаатида Галкинни «Россиянинг ҳақиқий ватанпарвари» деб атаб, у ўз мамлакатига «тинч ҳаёт, сўз эркинлиги»ни тилашини ва «йигитларнинг хаёлий мақсадлар учун ўлиб кетишини» хоҳламаслигини билдирган. Максим Галкин бир неча бор урушга қарши чиқди, босқин ва Россия раҳбариятининг ҳаракатларини қоралади.
Россия президентининг матбуот котиби Дмитрий Песков сентябрь ойи бошида Галкин «жуда ёмон баёнотлар» билан чиққани ва «у билан йўллар ҳар хил экани» тўғрисида маълум қилганди.
