Россиядаги Кремл пропагандасига ихтисослашган асосий телеканаллардан бири бўлмиш Russia Today телеканалида можароли чиқиш кузатилди. Телеканалнинг рус тилидаги таҳририяти раҳбари Антон Красовский эфир вақтида Украинадаги Россияга қарши кайфиятдаги рус болаларни чўктириб ёки ёқиб юбориш керак эканини айтди.
RT телеканали раҳбари Маргарита Симонян 24 октябр куни ўз каналида Красовскийнинг сўзларини жирканч деб атаб, уни ишдан бўшатганини айтди.
«Антон балки буни ўзи билмаган ҳолда оғзидан чиқиб кетгани билан изоҳлар, у чиндан болаларни чўктириб юбориш керак деб ўйлашига ишониш қийин. Ҳозир у билан келишувни бекор қиламиз, чунки бундай гаплар айтилишига йўл қўя олмаймиз», деди Россия бош пропагандачиларидан бўлмиш Симонян.
«Бу бизнинг усул»
Антон Красовский болаларни чўктириб юбориш ва ёқиш кераклиги ҳақида 20 октябр куни эфирга кетган «Антонимлар» кўрсатувида айтганди. Ўша куни кўрсатув меҳмони ёзувчи Сергей Лукяненко бўлган ва у ҳам тарғиботчи-журналистнинг сўзларидан ҳайратда қолган. Ёзувчи эфир давомида 1980 йил Украинага боргани, у ерда болалар «Украина москваликлар томонидан босиб олингани»ни айтгани ҳақида эслаганди.
Ёзувчи ўша болалар соф русча гаплашадиган рус болалар бўлганини айтганида Кросовский шундай жавоб берган: «Ўша болаларни Тисада (дарё) чўктириш керак эди. Плива кача (украинлар мотамда куйлайдиган қўшиқ) айтиладиган жойда чўктириш керак. Ҳа, ўша болаларни айнан чўктириб юбориш керак! Бу сизнинг услубингиз эмас, шунинг учун сиз интеллигентсиз, фантастик ёзувчисиз. Бу бизнинг услуб. Москваликлар босиб олган дедими, дарҳол дарёга чўктириш керак», деганди Кремл ва урушнинг фаол тарғиботчиси бўлган Красовский.
Ёзувчи эса пропагандачи-журналистнинг сўзларидан ҳайратга тушиб қадимги Русда болаларни жазолаш учун таёқдан фойдаланишганини айтади. Красовский эса болаларни ёқиб юбориш ҳам мумкинлигини қўшимча қилади. «Уларда арчадан қилинган кулбалар бўлади, ўша кулбасига қамаш ва ёқиб юбориш керак», дейди журналист.
Антон Красовский бу кўрсатувдан кейин ўзининг Telegram-каналида ёзувчи Сергей Лукяненко билан ажойиб эфир ўтказгани ҳақида пост ёзди, аммо кўп ўтмай уни ўчириб юборди.
Meanwhile on Russia's state-funded RT, director of broadcasting Anton Krasovsky suggests drowning or burning Ukrainian children, makes hideous comments about the rapes by Russian soldiers in Ukraine, says Ukraine should not exist and Ukrainians who resist Russia should be shot. pic.twitter.com/BGIaBNok4v
— Julia Davis (@JuliaDavisNews) October 23, 2022
Красовский хўжайини Маргарита Симонян уни ишдан ҳайдагани ҳақида пост ёзгач, ундан ва бошқалардан кечирим сўраб чиқди: «Мен чинданам жуда уяляпман, болалар ҳақида чегарадан чиқиб гапирганим учун. Бунақаси бўлиб туради: эфирга чиқасан ва алжираб қоласан. Умид қиламан, мени кечирасизлар», деб ёзди у.
Россия Тергов қўмитаси раиси Александр Бастрикиннинг айтишича, пропагандачи журналистнинг эфирда айтган гаплари ўрганиб чиқилади. Бу иш билан Москва Тергов бошқармаси раҳбари Андрей Стрижов шуғулланадиган бўлди.
Украинанинг талаби
Украина томони Антон Красовскийнинг сўзларидан кейин Russia Today телеканалини бутун дунёда тақиқлаш кераклигини талаб қилди. «Бу канални тақиқламаганлар ўша лавҳани такроран томоша қилиши керак. Одамларни қиришга чақириш сўз эркинлигига кирмайди, агар бу канални тақиқламаган бўлсангиз, кўриб қўйинг кимлар томонида эканингизни», деди Украина ташқи ишлар вазири Дмитро Кулеба.
Украина ТИВ раҳбарининг чиқишлари дунёнинг кўплаб нашрларда эълон қилинди. Шундан сўнг, кўпчилик Russia Today бош муҳаррири Маргарита Симонянга мурожаат қилиб, ундан изоҳ сўради. У эса юқоридаги постини қолдириб, Красовскийни ишдан ҳайдагини айтди.
Мария Захарова журналистни қўллаб-қувватладими?
Антон Красовскийнинг 20 октябрда айтган сўзлари шу кунларда жуда кенг муҳокама қилинмоқда. Интернетда Россия ТИВ расмийси Мария Захарова Красовскийни ҳимоя қилгани айтилган видео тарқалди. Урушнинг Россиядаги бош тарғиботчиси Владимир Соловьёвнинг телеэфирида чиқиш қилган Захарова журналист Антон Красовский фантастик даражада истеъдодли одам экани, унга қарши ахборот уруши кетаётганини айтади.
Аслида эса Захарова бу сўзларни Красовскийнинг сўзларига жавобан айтмаган. Пропагандачи Соловёвнинг муаллифлик кўрсатувида Захарова бу сўзларни Красовскийнинг украиналик болаларни тириклайин ёқиб юбориш кераклигини айтганидан бир ярим ой аввал гапирган. Захарованинг ўзи ҳам бу сўзларни анча аввал айтгани, видеодан эса ахборот уруши доирасида фойдаланишаётганини иддао қилди.
Маълумот учун, Россия давлат бюджетидан молиялаштирилувчи Russia Today телеканали Кремлнинг ва айни дамда урушнинг асосий тарғиботчиларидан бири ҳисобланади. Телеканал дунёнинг қатор давлатларида бир нечта тилда фаолият юритади. Унинг бош муҳаррири Беслан теракти вақтида томошабинларга гаровга олинганлар сонини бир неча баробар камайтириб айтгани билан танилган Маргарита Симонян ҳисобланади.
Антон Красовский Russia Today телеканалига 2019 йилда ишга киради. Аввалига телеканаллар учун ҳужжатли филмлар тайёрлаган пропагандачи, кейинроқ YouTube'даги махсус русча кўрсатув продюсерига айланади. Кейинроқ эса телеканалнинг русча таҳририяти раҳбари бўлади.
«Медуза» манбалари Россия Украинага бостириб киргач, Russia Today телеканали айнан Красовскийнинг айтганлари асосида бошқарилаётганини маълум қилган. Уруш бошланганидан 4 кун ўтиб Красовский Европа Иттифоқининг Россияга қарши эълон қилинган биринчи санкциялари рўйхатига киритилганди.
