Адлия вазирлиги журналистлар учун учрашувда «E-qaror» орқали ҳокимларнинг қонунга зид қарорлари, энг кўп қонунбузилишига йўл қўйган ҳудудлар статистикани очиқлади. Kun.uz инфографикалар шаклида маълумотларни тақдим этади.
Адлия вазирлиги «E-qaror» фаолияти юзасидан матбуот анжумани ўтказди. Унда тизим мониторинги натижасида олинган қонунбузилишларга доир маълумотлар берилди, дея хабар қиляпти Kun.uz мухбири.
Ҳудудий адлия бўлимлари томонидан ўтказилган мониторингда Сурхондарё вилоятидаги ҳокимлар қарорларида энг кўп камчиликлар аниқланган – 1 686 та. Энг оз камчиликлар Қорақалпоғистон Республикасида.
Мониторинг натижаларига кўра ер соҳасига доир қонунчилик ҳужжатларида энг кўп қонунбузилишлар вилоят ҳокими ваколатида бўлган масалалар бўйича туман ҳокимлари қарор чиқаришига оид, яъни ер ажратиш, ер майдонларини захирага олиш, ер участкасига бўлган ҳуқуқни бекор қилиш каби масалаларда туман ҳокимлари 304 та ҳолатда ўзига тегишли бўлмаган ваколатдан фойдаланган.
Шунингдек, қонунчилик ҳужжатларини қабул қилишда бир қатор ҳолатларда ер қонунчилиги бузилган.
Ҳокимликлар ҳужжатлар шаклига риоя қилмаган ҳолда 986 та фармойиш (қарор шаклида қабул қилиниши лозим эди) қабул қилган. Бу қонунчилик нормаларига зид қабул қилинган ҳужжат турлари ичида етакчи ҳолатдир.
Бошқа ҳолатлар билан қуйидаги инфографикада танишинг:
Бундан ташқари, 2022 йил 14 декабргача бўлган даврда асоссиз равишда очиқ ҳолатда эълон қилинмаган ҳокимлик ҳужжатлари сони 2 800 га яқин. Маҳаллий бюджет қўшимча манбаларидан фойдаланиш тўғрисидаги ҳокимлик ҳужжатларини жамоатчилик муҳокамасидан ўтказишда эса 2 206 та ҳолатда қонунбузилишига йўл қўйилган.
Маҳаллий давлат ҳокимлиги органлари томонидан 230 266 та ҳужжат очиқ, 40 мингдан зиёд ҳужжат ёпиқ шаклда қабул қилинган.
Аввалроқ, «E-qaror» тизимига Face ID тизими жорий этилиши маълум қилинганди. 2023 йилдан бошлаб ҳокимлар ҳужжатларни шахсан ўзлари имзолашга мажбур бўлади.
