Жанубий Корея Мудофаа вазирлигининг фикрича, Владимир Путин Пхенянга ташрифи чоғида Ким Чен Ин билан КХДРдан Россияга кейинги қурол-яроғ етказиб бериш масаласини муҳокама қилади.
Шимолий Корея Россияга ичида беш миллионга яқин артиллерия ўқ-дорилари бўлиши мумкин бўлган контейнерлар жўнатди. Бу ҳақда Жанубий Корея мудофаа вазири Шин Вон Сик 14 июн, жума куни Bloomberg агентлигига берган интервюсида айтиб ўтди.
Вазирнинг таъкидлашича, Сеул Шимолий Кореядан Россияга камида 10 000 та юк контейнерлари олиб кетилганини қайд этган. Унинг сўзларига кўра, Россия президенти Владимир Путин, эҳтимол, Пхенянга яқин келажакда режалаштирилган ташрифи чоғида кейинги таъминотни мувофиқлаштиришга ҳаракат қилади.
«Путин Шимолий Корея билан хавфсизлик соҳасида, айниқса, фойдаланиш учун зарур бўлган артиллерия снарядлари каби ҳарбий таъминот соҳасида яқинроқ ҳамкорлик қилишга интилиши кутилмоқда», - дея Шиннинг сўзларидан иқтибос келтиради агентлик. Жанубий Корея Мудофаа вазирлиги раҳбарининг сўзларига кўра, Пхенян Россияга ўнлаб баллистик ракеталарни ҳам юборган.
Бунга жавобан Москва Шимолий Кореяга бир нечта айғоқчи сунъий йўлдошларни, шунингдек, танклар ва самолётлар каби оддий қуролларни жойлаштириш режаларини амалга оширишда ёрдам бериш учун технологияни топширди, дея таъкидлайди нашр.
Путиннинг Шимолий Кореяга режалаштирилган ташрифи
Россия президенти Владимир Путин яқин ҳафталарда Шимолий Кореяга ташриф буюришни режалаштирмоқда, деб хабар берди «Ведомости» газетаси 10 июн куни дипломатик доиралардаги манбасига таяниб. Ҳозир Путиннинг Пхенянга ташрифига «фаол тайёргарлик кўрилмоқда», деди Россиянинг КХДРдаги элчиси Александр Мацегора нашрга. Бундан ташқари, «Ведомости»нинг ёзишича, Путин Ветнамга ташриф буюриш ниятида. Нашр манбаларидан бирига кўра, иккала сафар ҳам июн ойида бўлиб ўтиши мумкин.
«Ведомости» қайд этишича, Путиннинг КХДРга ташрифи чоғида Шимолий Корея ишчиларини Россияга юбориш масаласи ҳам муҳокама қилиниши мумкин. Reuters агентлигининг эслатишича, Украинага қарши уруш туфайли Россия иқтисодиёти ўткир ишчи кучи танқислигига дуч келмоқда, чунки кўплаб эркаклар фронтга жўнатилган, уларнинг бир қисми ҳарбий хизматдан қочиш учун мамлакатни тарк этган.
Шимолий Корея раҳбари Ким Чен Ин 2023 йил сентябрида Россияга ташриф буюриб, зирҳли поездда Узоқ Шарққа келган эди. Ташриф давомида у Владимир Путинни Шимолий Кореяга таклиф қилди, Россия президенти бунга рози бўлди. Феврал ойида Ким Чен Иннинг туғилган кунида РФ Шимолий Корея етакчисига Россияда ишлаб чиқарилган лимузин совға қилган ва шу билан БМТ Хавфсизлик кенгаши томонидан КХДР ядровий дастури туфайли Пхенянга қарши жорий қилинган санкцияларни бузган эди.
Шу пайтгача Путин КХДРга фақат бир марта – Шимолий Кореяни Ким Чен Ир бошқарган 2000 йилда, биринчи президентлик муддатининг борган.
