Вадим Скибицкийнинг сўзларига кўра, яқин ойларда Россия Украинани беқарорлаштириш учун «уч даражали режа»дан фойдаланади, жумладан, Украина Қуролли кучлари позицияларига кенг кўламли ҳужум ва мамлакат ичида дезинформация кампанияси кузатилади.
Украина Мудофаа вазирлиги Бош разведка бошқармаси («ГУР») бошлиғи ўринбосари Вадим Скибицкий 2 май, пайшанба куни чоп этилган The Economist газетасига берган интервюсида айтишича, Киев яқин ойларда Россия кучларининг фронтда кенг кўламли ҳужумини кутмоқда. Унинг прогнозларига кўра, май ойида Россия армияси шарқда ҳужумга ўтади, шундан сўнг Харкив ва Суми вилоятларида ўз кучларини тўплашни бошлайди. Украина Қуролли кучларининг Донецк вилоятидаги таянчи бўлган Часив Ярнинг таслим бўлишини юқори мартабали генерал «вақт масаласи» деб атаган.
Скибицкийнинг таъкидлашича, Россия ҳозирда жами 514 минг нафар қуруқликдаги кучларга эга ва захираларни жалб қилиш орқали шахсий таркибни кенгайтиришни режалаштирмоқда. Ўз навбатида, Украина Қуролли кучлари, Бош разведка бошқармаси бошлиғи ўринбосарининг сўзларига кўра, кадрлар ва қурол етишмаслигидан азият чекмоқда. «АҚШ ёрдами олдинги қаторга етиб боришига бир неча ҳафта керак бўлади. Бу Россиянинг снарядлар захираларига мос келиши ёки Россиянинг паст технологияли ва бузғунчи бошқариладиган бомбаларидан самарали ҳимояни таъминлаши даргумон», - деди Вадим Скибицкий.
Бундан ташқари, Киев Москвадан Украина ичидаги сафарбарлик ва Володимир Зеленскийнинг сиёсий жиҳатдан қонунийлигини бузишга қаратилган дезинформацион кампанияни кучайтиришини кутмоқда.
Жиддий музокаралар 2025 йилнинг иккинчи ярмидан кейин бошланади
Скибицкийнинг сўзларига кўра, Украина Қуролли кучлари Россия қўшинларини чегараларгача ортга қайтаришга муваффақ бўлган тақдирда ҳам, Украина Россия Федерацияси билан урушда фақат жанг майдонида ғалаба қозона олмайди. «Бу урушга чек қўймайди», дея таъкидлади генерал ва жиддий музокаралар 2025 йилнинг иккинчи ярмидан кейин бошланиши мумкинлигини айтди. Ўшанда Россия Федерациясининг ҳарбий ишлаб чиқариш салоҳияти материаллар ва муҳандислар етишмаслиги туфайли сезиларли даражада камаяди.
Бош разведка бошқармаси бошлиғи ўринбосари Киев ҳар қандай ҳолатда ҳам курашни давом эттириш ниятида эканини, бироқ унинг натижаси нафақат Украинага, балки Европадаги ҳамкорларига ҳам боғлиқлигини таъкидлади. Скибицкийнинг сўзларига кўра, Европа Иттифоқи давлатлари Украинага ёрдам бериш учун мудофаа ишлаб чиқаришни янада ошириш йўлини топа олмаса, улар ҳам охир-оқибат Россия билан тўқнашувга дуч келади.
