Президентнинг январ ойидаги топшириғига асосан, янги хусусийлаштириш дастури ишлаб чиқилди. Дастурга улушлари оммавий савдога қўйиладиган 250 га яқин корхона, маҳаллий фонд бозорида акцияларнинг оммавий таклифи ўтказиладиган 12 та корхона ва қарийб мингта кўчмас мулк объекти киритилди. Сотилмай турган объектларнинг нархи туширилади.
Президент Шавкат Мирзиёевга 2024 йилги хусусийлаштириш дастури ва унинг ижросини самарали ташкил этишга қаратилган чора-тадбирлар ҳақида ахборот берилди.
Шу йил 16 январ куни иқтисодиётни ривожлантириш масалалари бўйича ўтган видеоселектор йиғилишида Вазирлар Маҳкамасига янги хусусийлаштириш дастурини тайёрлаш вазифаси қўйилган эди. Шунга асосан, давлат иштирокидаги корхоналарнинг улуши ва кўчмас мулк объектлари самарадорлик жиҳатидан таҳлил қилиниб, янги дастур ишлаб чиқилди. Хусусан, иқтисодиётда давлат иштирокини қисқартириш мақсадида оммавий савдоларга чиқариладиган 250 га яқин улуш рўйхати, давлат иштирокидаги корхоналарнинг қарийб мингта кўчмас мулк объекти рўйхати, маҳаллий фонд бозорида акцияларнинг оммавий таклифи ўтказиладиган 12 та корхона рўйхати шакллантирилди.
Қайд қилинишича, илгари савдога қўйилган айрим иншоотлар сотилишида муаммолар бор. Буни жадаллаштириш ва иқтисодиётда хусусий сектор улушини ошириш мақсадида қатор енгилликлар белгиланмоқда. Масалан, давлат активлари 3 ойда сотилмаганда (Тошкент шаҳри ва вилоят марказлари бундан мустасно) уларнинг бошланғич баҳоси 10 фоизгача босқичма-босқич пасайтирилади. 2024 йил 1 январгача аукцион орқали ижарага олганига камида 5 йил бўлган ва мажбуриятларини бажарган тадбиркорларга давлат мулкини баҳоланган қийматда сотиб олиш таклиф этилади.
Қишлоқ хўжалигига мўлжалланмаган ер участкалари 3 ойда сотилмаганда (Тошкент шаҳри ва вилоят марказлари бундан мустасно) бошланғич қиймати 30 фоизгача, 6 ойда сотилмаганда 10 фоизгача пасайтирилади. Тўловларнинг 15 фоизини 3 ой муддатда, қолган қисмини 10 йилгача муддатда бўлиб-бўлиб тўлаш имконияти яратилади.
Хусусийлаштириш дастурларига киритилган кўчмас мулкларнинг кадастр ҳужжатларидаги камчиликларни бартараф этиш учун тўловларни Хусусийлаштириш жамғармаси ҳисобидан амалга оширишга рухсат берилади.
Шунингдек, янги дастур доирасида, тадбиркорлик ва шаҳарсозлик фаолияти учун ҳамда халқаро автомобил йўллари бўйида савдо ва сервис объектларини жойлаштириш учун савдоларга чиқариладиган ер участкаларининг рўйхати шакллантирилди ҳамда уларни савдога чиқариш соддалаштирилди.
Бу борада ҳам янги тартиблар белгилаш таклиф этилмоқда. Жумладан, мастер-режа асосида халқаро аҳамиятдаги автомобил йўллари бўйида жойлашган ер участкалари замонавий сервис ва савдо-маиший объектларни қуриш учун аукционга чиқарилади. Сотилган ер участкалари харидорга чекловларсиз расмийлаштириб берилади.
Йиғилишда давлат иштирокидаги йирик корхоналарни трансформация қилиш ва хусусийлаштириш масалаларига алоҳида эътибор қаратилиб, буни жадаллаштириш бўйича таклифлар муҳокама қилинган. Аграр соҳага хизмат кўрсатувчи давлат иштирокидаги корхоналарни хусусийлаштириш чора-тадбирлари ҳам кўриб чиқилган.
Давлат раҳбари бу жараёнларни жадаллаштириш, хусусийлашган бино-иншоотлар негизида тадбиркорликни ривожлантириб, кўпроқ иш ўринлари очиш юзасидан кўрсатмалар берди.
Ўз соҳасида хусусий сектор улушини муттасил ошириб бориш, самарасиз фойдаланилаётган ва бўш турган активларни сотиш маҳаллий ҳокимлик ва тармоқ раҳбарларининг асосий вазифаларидан бўлиши кераклиги кўрсатиб ўтилди.
