Davlat Bobonov – dzyudo bo‘yicha jahon chempioni

Toshkentda o‘tkazilayotgan dzyudo bo‘yicha jahon chempionatida -90 kg vazn toifasida final yakuniga yetdi.

Hal qiluvchi bahsda Davlat Bobonov yoshlar o‘rtasida jahon chempioni italiyalik Kristian Parlati ustidan g‘alaba qozonib, oltin medalni qo‘lga kiritdi.

E’tiborlisi, O‘zbekiston prezidenti Shavkat Mirziyoyev «Humo» arenaga tashrif buyurib, final bahsini bevosita tomosha qildi.

Samarqand dzyudo maktabi tarbiyalanuvchisi sanalmish Bobonov bugungi kurashlarda dastlab slovakiyalik Peter Zilkadan ustun kelgan bo‘lsa, so‘ng janubiy koreyalik Jyeu Op Xanni ippon evaziga mag‘lub etdi. Chorakfinalda esa bolgariyalik Ivaylo Ivanov ham ippon bahosi bilan taslim etildi. Murosasiz o‘tgan yarimfinal bahsida esa gruziyalik Lasha Bekauridan ustun kelgan o‘zbekistonlik dzyudochi finalga chiqib, Kristian Parlatini mag‘lubiyatga uchratdi.

Ma’lumot uchun, 25 yoshli sportchi Tokio-2020 Olimpiadasida bronza medalini qo‘lga kiritgan edi. 2021 yilda esa Budapeshtda o‘tgan dzyudo bo‘yicha jahon chempionatida kumush medali, Bishkekdagi Osiyo chempionatida esa oltin medalga ega chiqqandi.