Pokiston bilan hamkorlik O‘zbekiston uchun qay darajada muhim?

Pokiston bosh vaziri Shahboz Sharif rasmiy tashrif bilan O‘zbekistonga keldi. Bu ikki mamlakatning o‘zaro aloqalari tarixi va hamkorlikning ahamiyati haqida siyosatshunos Sayfiddin Jo‘rayev fikr yuritdi.

O‘zbekiston tashqi siyosati va diplomatiyasi shiddat bilan rivojlanib bormoqda. Bu jarayon mamlakat rivojlanishining yangi bosqichiga chiqib olganidan, iqtisodiy-ijtimoiy islohotlarni kengaytirish uchun xalqaro hamjamiyatning ishtirokchilari bilan faol aloqalar o‘rnatish orqali investitsiyalarni olib kirish, o‘zaro savdo-sotiqni kengaytirishni kun tartibiga qo‘ygan. Bu borada Pokiston bilan an’anaviy aloqalarni kengaytirish va chuqurlashtirish, ikki va ko‘p tomonlama munosabatlarni yangi vaziyatdan kelib chiqib, kun tartibini aniqlashni dolzarb masalaga aylantirdi.

Pokiston O‘zbekiston mustaqilligini 1991 yil 20 dekabrda tan olgan. Ikki mamlakat o‘rtasida diplomatik munosabatlar 1992 yil 10 mayda o‘rnatilgan. Pokistonning Toshkentdagi elchixonasi 1992 yilning iyun oyida ochilgan, O‘zbekistonning Islomoboddagi elchixonasi esa 1994 yil iyul oyidan buyon faoliyat ko‘rsatmoqda. O‘zbekistonda Pokiston sarmoyasi ishtirokida 207 ta korxona faoliyat ko‘rsatyapti. Ular asosan savdo, to‘qimachilik, qog‘oz, charm, oziq-ovqat mahsulotlari ishlab chiqarish, transport va turizm xizmatlarini ko‘rsatish sohalarida faoliyat yuritadi.

Bugungi rasmiy tashrif davomida oliy darajadagi muzokaralar kun tartibidan O‘zbekiston—Pokiston strategik sheriklik va ko‘p qirrali hamkorlik munosabatlarini yanada rivojlantirish hamda kengaytirish masalalari o‘rin olgan. Shuningdek, savdo-sotiq hajmini oshirish, transport bog‘liqligini kuchaytirish va tranzit salohiyatini ro‘yobga chiqarish, yengil va charm sanoati, qishloq xo‘jaligi, farmatsevtika, elektrotexnika va iqtisodiyotning boshqa tarmoqlarida kooperatsiya loyihalarini ilgari surish borasidagi qo‘shma rejalarni muhokama qilish nazarda tutilgan.

Shu bilan birga, madaniy-gumanitar va turizm aloqalarini faollashtirish masalalari ham ko‘rib chiqiladi. Xalqaro va mintaqaviy ahamiyatga molik dolzarb masalalar yuzasidan fikr almashish va ishbilarmonlik dasturi doirasida ikki davlat yetakchilarining qo‘shma biznes forumda ishtirok etishi kutilmoqda. Qo‘shma deklaratsiya va qator ikki tomonlama hujjatlar qabul qilinishi rejalashtirilgan.

#professor #Sayfiddin Jo‘rayev #siyosiy fanlar doktori