Londonning Gatvik aeroportida «Rossiya» aviakompaniyasi samolyoti yer usti xizmati xodimiga jarohat yetkazdi, deb xabar bermoqda Evening Standart.
Hodisa 28 mart kuni kechqurun yuz berdi. Ijtimoiy tarmoqlarda e'lon qilingan fotosuratlardan ko‘rish mumkinki, samolyotni politsiya, tez yordam va o‘t o‘chirish xizmati mashinalari o‘rab olgan.
Rasmiy ma'lumotlarga ko‘ra, aeroport xodimi oyog‘idan o‘ta jiddiy jarohat olgan va shifoxonalardan biriga havo transporti orqali olib ketilgan.
Yo‘lovchilardan biri Flora Luning aytishicha, Sankt-Peterburgga jo‘nab ketishga chog‘lanayotgan samolyot uchishga tayyorgarlik vaqtida yer usti xizmati xodimi oyog‘ini bosib ketgan. Keyinchalik uning qo‘shimcha qilishicha, samolyotning qo‘shimcha «detallari» kutilmoqda, sababi havo kemasi foydalanishga yaroqsiz holatda turibdi.
